Azərbaycan, Bakı, 22 aprel/ Trend müxbir İ.Xəlilova/Cənubi Koreyanın Kepko şirkəti Azərbaycan hökumətinə Ələt qəsəbəsində (Bakı yaxınlığında) özəl istilik elektrik stansiyasının tikintisi layihəsinin reallaşdırılmasından sonra energetika sahəsində gələcək əməkdaşlıq haqqında memorandum təqdim edib. Bu barədə çərşənbə axşamı İqtisadi İnkişaf Nazirliyinin İnvestisiya siyasəti şöbəsinin rəisi Əsgər Ələkbərov məlumat verib.
"Biz Nazirlər Kabineti vasitəsilə onu müzakirəyə çıxarmışıq və əgər lazım hesab etsələr, memorandumun imzalanması Cənubi Koreyanın Baş naziri Han Sın Sunun (Han Seung -soo) mayda Azərbaycana səfərinin gedişində mümkün olacaq", - Ələkbərov qeyd edib.
Kepko elektrik stansiyasının tikilməsini, elektrik ötürücü xətlərin müasirləşdirilməsini təklif edir.
Kepko-nun birinci layihəsi üzrə şirkət tərəfindən təqdim edilmiş və 818 MVt gücündə özəl istilik elektrin stansiyasının tikintisi üzrə müqavilənin bağlanması üçün lazım olan doqquz sənədin hökumətdə öyrənilməsi davam edir. Bu sənədlər arasında texniki-iqtisadi əsaslandırma, enerji konversiyası haqqında və torpağın icarəsi haqqında Sazişlər var.
Bu sənədlərin razılaşdırılması başa çatdığı halda, bu sənədlərin imzalanması mayda baş tuta bilər. Bu qrafika uyğun olaraq iyunda bünövrənin qoyulmasını həyata keçirməyə imkan verəcək.
Kepko-nun təklifləri Azərbaycan tərəfindən qəbul edildiyi halda elektrik stansiyası 3, - 3,5 il müddətində tikiləcək.
Layihənin dəyəri 640 mln. manat (523 mln. avro) qiymətləndirilir. Layihənin hazırlanmış texniki-iqtisadi əsaslandırmasına əsasən, stansiya iki qaz və bir buxar turbinindən ibarət olacaq. Faydalı iş əmsalı isə 57,27 faiz qiymətləndirilir.
Stansiyada müasir qaz turbinlərindən istifadə nəticəsində 1 kVt/s elektrik enerjisinin alınması üçün 0,185 kubmetr təbii qazdan istifadə etmək nəzərdə tutulur ki, bu da 1 kubmetr qazdan 5,4 kVt/s enerji alınması deməkdir. Stansiyanın 1 kVt gücünün "açar altında" tikintisi üçün 783 manat (640 avro) sərf ediləcək.
Belə layihənin Azərbaycan və bütün post-sovet məkanında birinci dəfə reallaşdırıldığını nəzərə alaraq, layihənin qiymətləndirilməsi üçün İİN beynəlxalq ekspertləri dəvət edib. Fransanın BNP Paribas bankı maliyyə məsləhətçisi, Allen & Overy - hüquqi məsləhətçi, MottMacDonald - texniki və Azərbaycanın MGB yerli hüquqi məsləhətçi kimi cəlb edilib.
Layihənin reallaşdırılması üçün dövlət büdcəsindən vəsait cəlb edilməsi və kreditlərə dövlət zəmanətinin təqdim edilməsi nəzərdə tutulmur. Belə ki, investor bütün xərcləri öz üzərinə götürmək niyyətindədir. Layihənin daha bir üstünlüyü elektrik enerjisinin istehsalı üçün təbii qazdan istifadə edilməsidir və bu müasir texnologiyaların tətbiqi nəticəsində təmin ediləcək.
Şirkət tərəfindən tikinti və idarə müddəti 25 ilə təqdim edilib ki, bu da normal dünya təcrübəsidir.
Müəlliflə əlaqə saxlamaq üçün elektron ünvan: cap
