Azərbaycan, Bakı, 23 aprel/ Trend müxbir S.Əliyev/ Azərbaycan "Şahdəniz" qaz-kondensat yatağının işlənməsi layihəsinin ikinci mərhələsinin reallaşdırılmasınadək öz qazının Yunanıstana tədarükünə başlaya bilər. İkinci mərhələni 2013-cü ildə reallaşdırılmağa başlamaq nəzərdə tutulur. Bu barədə çərşənbə günü Azərbaycan Dövlət Neft Şirkətinin (ARDNŞ) yüksəkvəzifəli nümayəndəsi məlumat verib.
Müqaviləyə əsasən, "Şahdəniz" layihəsinin birinci mərhələsi çərçivəsində qaz yalnız Azərbaycan, Gürcüstan və Türkiyəyə satılır və onun başqa ölkələrə tranziti nəzərdə tutulmur.
Hazırda Azərbaycan və Türkiyə arasında Azərbaycanın qazının bu ölkənin ərazisi vasitəsilə Avropa ölkələrinə nəqli üzrə tranzit müqavilənin müzakirəsi gedir. ARDNŞ nümayəndəsinin sözlərinə görə, "Türkiyənin, daha məqbul nəqletmə variantlarının təqdim edilməsinə olan marağı nəzərə alınarsa, tranzit müqaviləsi üzrə irəliləyiş var".
ARDNŞ nümayəndəsi hazırda Türkiyənin "Şahdəniz" yatağının işlənilməsinin ikinci mərhələsindən onun nə qədər qaza ehtiyacı olduğunu dəqiqləşdirdiyini bildirib.
Yunanıstan da Azərbaycan qazını almaq niyyətindədir. Yunanıstan tərəfdən "Şahdəniz" layihəsinin ikinci mərhələsində Azərbaycandan 1,5-2 mlrd. kubmetr qazın tədarükünə dair müqavilə layihəsi təqdim edilib. Qazı ötən il istismara verilən və Yunanıstan ilə Türkiyəni birləşdirən boru kəməri bəndi ilə tədarük etmək nəzərdə tutulur.
ARDNŞ-da "Şahdəniz" layihəsinin ikinci mərhələsinin reallaşdırılmasınadək (2013-cü ilədək) Azərbaycan və Yunanıstanın ikitərəfli müqavilə bağlaya biləcəklərini istisna etmirlər. Bu müqavilə üzrə qaz tədarükü həyata keçirilə bilər. Dövlət Neft Şirkətinin nümayəndəsi bildirib ki, bu yalnız Türkiyənin Azərbaycan qazının tranzitinə icazə verdiyi halda baş verə bilər.
"Bu gün Azərbaycan Avropadakı alıcıları ilə öz qazının konkret tədarük həcmləri haqqında danışıqlar apara bilməz. Belə ki, Türkiyənin öz ehtiyacları üçün nə qədər qaz götürəcəyi və qazın Avropa ölkələrinə çatdırılması üçün hansı nəqliyyat dəhlizinin seçiləcəyi məlum deyil", - Azərbaycan Dövlət Neft Şirkətinin nümayəndəsi bildirib. O, Avropaya tranzit üçün dəhlizin "Şahdəniz" üzrə tərəfdaşların netto-gəlirlərindən asılı olaraq seçiləcəyini qeyd edib.
"Nəqletmə xərclərini çıxmaqla Azərbaycan və tərəfdaşlara daha yüksək netto-gəlir saxlayan dəhliz seçiləcək", - ARDNŞ nümayəndəsi bildirib.
Müəlliflə əlaqə saxlamaq üçün elektron ünvan: [email protected]
