Azərbaycan, Bakı, 19 avqust / Trend , müxbir E.İsmayılov/ Sentyabrın sonunadək Azərbaycan Dövlət Neft Şirkətinin (ARDNŞ) Gürcüstanın Kulevi limanındakı neft terminalının yükboşaltma gücü sutkada 11 min tondan çox neft maye yükü təşkil edəcək. Bu barədə çərşənbə axşamı terminaldan bildiriblər. Bu, terminalın illik gücünün ildə 4 mln. tona çatdırılmasına imkan yaradacaq.
Terminalda hər birində 35-36 vaqondan ibarət olan altı qatarın boşaldılması mümkün olacaq.
"Terminalda neft maye yükləri tədarükünün sentyabrın sonlarınadək stabilləşəcəyi gözlənilir. Hələ ki, tədarük qeyri-stabildir, bu səbəbdən planlaşdırılan gücü əldə edə bilmirik", - deyə terminaldan bildiriblər.
Kulevidəki terminal eyni zamanda 168-dək vaqon-sistern qəbul edə bilər. Terminalın ümumi yükboşaltma gücü 2 mln. ton xam neft, 3 mln. ton dizel yanacağı, 4 mln. ton mazut da daxil olmaqla, 10 mln. ton neft maye yükü təşkil edir. Terminalın ehtiyat parkının ümumi tutumu 320 min kubmetrdir. Layihədə yükboşaltma gücünün 15-20 mln. tonadək artırılması və ehtiyat parkının 380 min kubmetrə qədər genişləndirilməsi nəzərdə tutulub.
Terminal tikintisinin başa çatdırılması üçün ARDNŞ ötən il 305 mln. dollar həcmində iri sindikatlaşdırılmış kredit əldə edib. Kredit verən qismində "ABN Amro", "Societe Generale" və "BNP Paribas" başda olmaqla, on beş Avropa bankından ibarət sindikat çıxış edib. Xarici bankın kredit sindikatına "Societe Generale" rəhbərlik edib. ARDNŞ neftin yüksək qiymətləri və neft hasilatı artımını nəzərə alaraq 2009-cu ilədək krediti tam olaraq ödəmək niyyətindədir.
Terminal dörd dəmir yolu, giriş kanalı və üç yanalmaya malikdir. Terminalın strukturuna neft və neft məhsullarının keyfiyyətinin yoxlanılması üzrə laboratoriya, qaz yüklənməsi üçün xüsusi eskadalar, həmçinin doqquz köməkçi servis gəmisindən ibarət mobil donanma və 13,8 km uzunluğunda "Kolxeti-Kulevi" yeni dəmir yolu xətti daxildir. Hesablamalara görə, terminal 100 min tondan 150 min ton dedveytə qədər tankerləri qəbul etmək imkanına malikdir.
Məqalə müəllifi ilə əlaqə ünvanı [email protected]
