Azərbaycan, Bakı, 18 sentyabr/ Trend müxbir E.İsmayılov/ "Azərbaycan Xəzərin Azərbaycan sektorunda "Azəri - Çıraq - Günəşli" (AÇG) neft yataqları blokunun işlənilməsi layihəsi çərçivəsində, mənfəət neftindən gəlirlərin əldə edilməsinin ən yüksək mərhəhləsinə çatıb (80 faizin 20 faizə nisbəti)", - Azərbaycan Dövlət Neft Fondunun icraçı direktoru Şahmar Mövsümov cümə axşamı bildirib. Ölkə bir neçə ay qabaqlama ilə bu göstəriciyə çatıb; əvvəllər xarici neft şirkətləri və Azərbaycanın Dövlət Neft Şirkəti (ARDNŞ) arasında neft hasilatından əldə edilən gəlirlərin bölünməsinin yeni mərhələsinə keçidin 2008 - ci ilin sonu - 2009 - cu ilin əvvəlində həyata keçiriləcəyi gözlənilirdi.
Mövsümovun sözlərinə görə, 2007- ci ildə gəlirlərin bölünməsində Azərbaycanın payı 25 faiz olub, 2008 - ci il yanvarın 1 - dən isə, 50 faizədək artıb. 2008 - ci ilin sonunadək yatırılan sərmayələrin maksimal səmərəliliyinin real norması (R-faktor) 30/70 faiz səviyyəsində olub, ilin əvvəlində əvvəlcə 50/50 faiz, aprelin 1 - dən isə, 75/25 faiz nisbətinə çatdırılıb. R-faktorun 80/20 faizə dəyişdirilməsi ARDNF gəlirlərinin 9 -10 mlrd. manatadək artması ilə nəticələnir ki, bununla əlaqədar Neft Fondunun cari il üçün 3,609 mlrd. manat planlaşdırılan büdcəsinə düzəlişlər edilib.
Gəlirlərin bölünməsinin ikinci səviyyəsinə keçid neft qiymətlərinin yüksək olması ilə bağlı sürətlənib. Belə ki, əvvəllər ona 2010 - 2011 - ci illərdə çatmaq nəzərdə tutulurdu.
"Neftin qiymət artımı ilə əlaqədar yatırılan sərmayələr sürətli templərlə qaytarılır. Bununla bağlı olaraq, xarici podratçıların əmlaklarının ARDNŞ -nin mülkiyyətinə keçməsi prosesi sürətlənib və sıfır balansa keçmək vaxtı çatıb", - Mövsümov bildirib.
2008 - ci ilin dövlət büdcəsində neftin qiyməti 70 doll/barel məbləğdə müəyyən edilib.
Sentyabrın 18 - nə olan cari mübadilə məzənnəsi -- 0,8126 AZN/USD.
Müəlliflə əlaqə saxlamaq üçün elektron ünvan: [email protected]