Azərbaycan, Bakı, 23 sentyabr/ TrendCap , müxbir E.İsmayılov/" ChevronTexaco Amerika şirkətinin Qazaxıstanda hasil etdiyi neftin Azərbaycan Dövlət Neft Şirkətinə (ARDNŞ) məxsus Gürcüstanın Qara Dəniz Kulevi terminalı vasitəsilə ilkin mərhələdə aşırılmasının aylıq həcmi 100 min tona yaxın təşkil edəcək", - çərşənbə axşamı terminalın nümayəndəsi deyib.
"Terminal vasitəsilə qazax neftinin nəql edilməsi üçün "Tengizşevroyl"şirkəti ilə müqavilə imzalanıb, lakin hazırda kanalın dərinliyi böyük gəmilərin qəbul edilməsinə imkan vermir. Biz kanalın dibinin dərinləşdirilməsi üzrə işlərə başlamışıq", - terminaldan deyiblər.
Neftin nəqlinə cari ilin noyabrında başlanılması nəzərdə tutulub.
İldə 4 mln. ton neftin aşırılması Azərbaycan Dövlət Xəzər Dənizi Gəmiçiliyinin gəmiləri ilə həyata keçiriləcək.
ChevronTexaco Qazaxısatnın "Tengiz"yatağının operatorudur. Müqavilə meydançasının hazırlanması ilə "Tengizşevroyl"əməliyyat şirkəti məşğuldur.
ChevronTexaco "Tengiz"yatağından hasil edilən neftin əksər hissəsini Azərbaycan - Gürcüstan dəmir yolu vasitəsilə Qara dənizdəki Batumi və Kulevi limanlarına nəql edəcək.
" ChevronTexaco neftin bir hissəsini Bakı -Tbilisi Ceyhan (BTC) boru kəməri vasitəsilə nəql edəcək", - ARDNŞ - nin nümayəndəsi qeyd edib. ChevronTexaco - nun BTC layihəsində iştirak payı 8,9 faiz təşkil edir.
Gürcüstanın Kulevi Qara dəniz terminalının sahibi ARDNŞ, Batumidəki neft terminalının sahibi isə "KazMunayqaz"dır.
Kulevi terminalı eyni vaxtda 168 sistern -vaqonu qəbul edə bilər. Terminalın ümumi aşırma gücü, 2 mln. ton xam neft, 3 mln. ton dizel yanacağı, 4 mln. ton mazut daxil olmaqla, ildə 10 mln. maye neft məhsullarıdır. Terminalın çən parkının ümumi tutumu 320 min kubmetrdir. Terminalın illik gücünü 15- 20 mln. tonadək artırmaq, çən parkını i 380 min kubmetrədək genişləndirmək planlaşdırılır.
Terminal dörd dəmir yoluna, yanaşma kanalı və üç körpüyə malikdir. Terminalın strukturuna neft və neft məhsullarının keyfiyyətinin yoxlanılması üzrə laboratoriya, qazın yüklənilməsi üçün xüsusi estakadalar, doqquz yardımçı servis gəmisindən ibarət mobil donanma, yeni, 13,8 kilometr uzunluğunda "Kolxeti-Kulevi" dəmir yolu xətti daxildir. Hesablamalara əsasən, terminal 100 mindən 150 min tonadək dedveytli gəmiləri sərbəst qəbul edə bilər.
SOCAR Georgia-nın həmtəsisçiləri: ARDNŞ - 51 faiz, Petro-Trans FZCO - 32,7 faiz və İvan Çxartişvili - 16,3 faiz.