Azərbaycan, Bakı, 11 noyabr/ Trend , müxbir İ.Xəlilova/ "Azərbaycan hökumətinin neftin bir barelinə görə 70 dollar qiymət əsasında formalaşdırılmış qısamüddətli və uzunmüddətli inkişaf strategiyası narahatlıq doğurmamalıdır", - parlamentin İqtisadi siyasət komissiyasının sədri Ziyad Səmədzadə çərşənbə axşamı Milli Məclisin 2009-cu ilin dövlət büdcəsi layihəsinin müzakirəsi üzrə plenar iclasında bildirib.
"Ölkə hökuməti neftin müxtəlif qiymətləri (50, 60, 65 dollar) əsasında gəlirlər üzrə məlumatlara malikdir", - Səmədzadə bildirib.
Azərbaycan Beynəlxalq Əməliyyat Şirkətinin məlumatlarına əsasən, neftin ixrac zamanı formalaşan orta qiyməti 2008-ci ilin birinci rübündə 96,5 dollar, ikinci rübündə - 122,8 dollar, üçüncü rübündə - 126 dollar təşkil edib. Doqquz ay ərzində orta ixrac qiyməti 111 dollar təşkil edib.
"Hazırki templər davam edərsə, neftdən dövlət büdcəsinə daxilolmalar gözlənildiyindən çox olacaq ki, bu da hökumətin düzgün kursunu təsdiqləyir", - İqtisadi siyasət komissiyasının rəhbəri bildirib.
Onun sözlərinə görə, neft ölkəsi kimi Azərbaycanın böyük imkanları olsa da, büdcə gəlirlərinin formalaşmasında neft daxilolmalarının xüsusi çəkisi hələ də yüksəkdir. Son yeddi il ərzində neftin qiymətində dəyişmələr ölkəyə böyük gəlirlər gətirib. 2002-ci ildə neftin bir barelinin orta qiyməti 25,7 dollar, 2007-də 71 dolar təşkil edib, 2008-ci ildə xammalın dəyərinin 100 dolları ötəcəyi gözlənilir. 2009-cu ilin dövlət büdcəsi proqnozlaşdırılarkən, neftin qiyməti bir barelə görə 70 dollar müəyyən edilib.
"Hesab edirəm ki, bu, dövlətin düzgün və düşünülmüş siyasətidir, - Səmədzadə bildirib. - Azərbaycanda kifayət qədər strateji valyuta ehtiyatları, maliyyə imkanları var və onların artması fonunda illərlə yığılmış problemləri həll etmək mümkündür".
Maliyyə və İqtisadi İnkişaf nazirlikləri neftin müxtəlif qiymətlərinə əsaslanaraq müxtəlif proqnozlar hazırlayıblar. Səmədzadənin rəyinə görə, Dövlət Neft Fondu olmadan sosial və iqtisadi proqramları reallaşdırmaq mümkün olmazdı və bu halda dövlət xərclərini azaltmaq lazım gələrdi ki, bu da iqtisadi inkişaf templərinin azalması təhlükəsi ilə nəticələnə bilərdi.
Müəlliflə əlaqə saxlamaq üçün elektron ünvan: [email protected]
