Bakı, Azərbaycan, 14 noyabr/ Trend , müxbir S.Əliyev/ "Avropa İttifaqının Qafqaz və Mərkəzi Asiya ölkələri ilə münasibətləri qaz tədarüklərinin diversifikasiyası məsələlərində böyük strateji əhəmiyyət kəsb edir", - Aİ-nin enerji məsələləri üzrə komissarı Andris Piyebalqs cümə günü Bakıda IV Enerji Sammitində bildirib.
Onun sözlərinə görə, Gürcüstandakı hadisələr bir daha bu faktı təsdiq edib.
"Biz tamamilə dərk edirik ki, bu sammiti keçirən ölkə, diversifikasiya və enerji təhlükəsizliyi məsələlərinə dair çətin və cəsarətli qərar qəbul edib", - Piyebalqs bildirib.
Aİ - nin strateji tərəfdaşlarının diversifikasiyaya maraq göstərməsi onların danışıqlar mövqeyinin güclənməsi ilə şərtlənir, - komissar əlavə edib.
"Biz tədarükçülər tərəfindən sabit diversifikasiya üçün mexanizm realizə etmək istəyirik", - Piyebalqs bildirib.
Komissar Xəzər regionundan enerji daşıyıcılarının tədarükü üçün "Cənub dəhlizi"nin işlənilməsinin vacib əhəmiyyətini vurğulayıb.
"Cənub qaz dəhlizi" Türkiyə ərazisi vasitəsilə Xəzər regionundan Avropaya gedən və Mərkəzi Asiya qazının Köhnə Dünyaya nəqli üçün nəzərdə tutulmuş planlaşdırılan marşrutdur. Dəhlizə Türkmənistandan Azərbaycana TransXəzər boru kəməri və Türkiyədən başlayaraq,"Bolqarıstan, Rumıniya və Macarıstan ərazisindən keçməklə, Avstriyada başa çatan "Nabukko" qaz kəməri daxildir.
