Azərbaycan, Bakı, 12 dekabr/ Trend , müxbir E.İsmayılov/ "Azərbaycanın SOCAR və Qazaxıstanın "KazMunayqaz" şirkətləri cümə günü Bakıda xarici şirkətlər üçün Xəzər Neft Nəqli Sisteminin təqdimatını keçirəcəklər", - SOCAR-ın prezidenti Rövnəq Abdullayev cümə günü bildirib.
Bunun üçün Qazaxıstanın "Kaşağan" dəniz yatağının işlənilməsi layihəsinin iştirakçıları və eyni zamanda Bakı - Tbilisi - Ceyhan (BTC) neft kəməri layihəsinin sərmayədarları olan Eni, Total, ConocoPhillips və İnpex şirkətlərinin nümayəndələri Azərbaycanın paytaxtına gəliblər. Təqdimatda BP şirkəti də (BTC-nin operatoru) iştirak edəcək.
SOCAR və "KazMunayqaz" noyabrın ortalarında Bakıda Xəzər Neft Nəqli Sisteminin yaradılması haqqında saziş imzalayıblar. Sənəd layihənin birgə realizəsinin və birgə layihə şirkətinin yaradılmasının prinsiplərini müəyyən edir.
Sistemin istismarının birinci mərhələsində sutkada Bakıyadək 500 min barel Qazaxıstan neftini nəql etmək mümkün olacaq. Sonrakı mərhələlərdə bu rəqəm sutkada 750-1200 min barelə çatıdırılacaq. Sistemin yaradılmasını 2012-ci ilə başa çatdırmaq planlaşdırılır.
Neftin əsas hissəsi Bakı - Tbilisi - Ceyhan neft kəməriylə nəql olunacaq. Qazaxıstan xammalının böyük hissəsi "Kaşağan" yatağının payına düşəcək. Bu yataqdan hasilat 2013-cü ildə başlayacaq.
Müəlliflə əlaqə saxlamaq üçün elektron ünvan: с[email protected]