Azərbaycan, Bakı, 06 yanvar/ Trend , müxbir E.İsmayılov/Türkiyənin Energetika və Təbii Ehtiyatlar Nazirliyi, Rusiyanın Ukrayna ərazisi ilə təbii qaz tədarüklərini dayandırmasına görə, Azərbaycandan idxal edilən qazın həcminin artırılmasına dair danışıqların aparılması məsələsini hələ nəzərdən keçirmir, - Türkiyənin Enerji Nazirliyi Enerji Daşıyıcılarının Tranziti Şöbəsindən çərşənbə axşamı bildiriblər.
"Nazirliyin rəhbərliyindən hələ ki Azərbaycan qazının idxalının artırılması barədə danışıqların başlamasına dair sərəncam daxil olmayıb", - nazirlikdən bildiriblər.
Türkiyənin enerji naziri Helmi Gülərin sözlərinə görə, çərşənbə axşamı Rusiya Türkiyəyə təbii qaz ixracını dayandırıb. Bu barədə Türkiyənin Haber 7 İnformasiya Agentliyi xəbər verib.
Bu addım Rusiya və Ukrayna arasında baş verən qaz münaqişəsi ilə bağlıdır. Bazar ertəsi "Qazprom"un rəsmi nümayəndəsi Sergey Kupriyanov xəbər verib ki, Ukraynanın qazı mənimsəməsinə görə, avropalı istehlakçılar sutka ərzində 60 mln. kubmetrdən çox yanacağı almayıblar. Şirkət rəhbərliyi Rusiya qazının Ukrayna ərazisindən tranzitini, bu ölkənin "mənimsədiyi" 65,3 mln. kubmetr həcmində, azaltmaq barədə qərar qəbul edib.
Rusiya ("Qazprom") və Ukrayna ("Naftoqaz") tərəfləri hələ ki, 2009 - cu ildə qazın tədarükünə dair müqavilə bağlamayıblar; Kiyev yeni satış qiymətləri ilə razılaşmır. "Qazprom" yanvarın 1 - dən Ukrayanaya qazın 1 min kubmetrini 418, yanvarın 4 - dən isə 450 dollara almağı təklif edib. Əvvəllər Ukrayna tərəfi 1 min kubmetri 250 dollara güzəştli tədarükdən imtina edərək, 200 - 235 dolları optimal adlandırmışdı.
Rusiya qazının Ukraynaya ixracının dayandırılması nəticəsində, Xorvatiya, Çexiya, Macarıstan, Makedoniya, Bolqarıstan, Yunanıstan, Türkiyə, Avstriya və Cənubi Avropanın bir sıra ölkələrinə qazın verilişi dayandırılıb və ya məhdudlaşdırılıb.
Moskva və Kiyev arasında qaz böhranına görə Rusiya qazının Türkiyəyə ixracının dayandırılmasından sonra, Ukraynanın Ankaradakı səfiri ölkənin Energetika və Təbii Ehtiyatlar Nazirliyinə çağırılıb. Bu barədə Türkiyənin Cihan İnformasiya Agentliyi xəbər verib.
Səfir Sergey Korsunskinin sözlərinə görə, onun ölkəsi Türkiyəyə təbii qaz ixracının dayandırılmasına görə məsuliyyət daşımır. Rusiya və Ukrayna arasında danışıqlar davam edir və bir neçə gün ərzində Ukrayna ərazisi ilə qazın tranziti bərpa olunacaq, - diplomat əlavə edib.
Türkiyənin Botas dövlət şirkətinin məlumatlarına əsasən, Türkiyə 2009 - cu ildə Rusiyadan 22 mlrd. kubmetr, 2010 - cu ildə 24 mlrd. kubmetr qaz almağı planlaşdırırdı.
Müəlliflə əlaqə saxlamaq üçün elektron ünvan: [email protected]
