"Mərkəzi Azəri" yatağında kompressor stansiyasının işi tamamilə bərpa olunub
Azərbaycan, Bakı, 05 fevral/ Trend , müxbir E.İsmayılov/ Xəzər dənizinin Azərbaycan sektorunda yerləşən "Azəri" yatağının mərkəzi hissəsində "Azəri-Çıraq-Günəşli" yatağının işlənməsi zamanı əldə olunan səmt qazını verən kompressor stansiyasının təmiri tam olaraq başa çatdırılıb. Bu barədə cümə axşamı hökumətdəki mənbə bildirib.
"Azəri-Çıraq-Günəşli" yataqları blokunun işlənməsi üzrə operator BP sentyabrın 17 - də "Mərkəzi Azəri" yatağında neft hasilatını dayandırıb və yataqda quraşdırılan platformanın heyətini dənizdə qazın aşkar olunması səbəbindən evokuasiya edib.
Təhlükəsizlik məqsədi ilə yatağın qərb hissəsində "Qərbi Azəri" platformasından da hasilat dayandırılıb, bir müddət sonra bərpa olunub.
"Hazırda stansiya tərəfindən səmt qazı platformada işlər dayandırılanadək həyata keçirilən rejimdə verilir", - deyə mənbə bildirib.
Hazırda "Mərkəzi Azəri" hasilat platformasında hasilat yalnız beş quyuda aparılır və sutkalıq hasilat həcmi təqribən 111 min barel neft (15 min ton) təşkil edir.
"Azəri-Çıraq-Günəşli" yataqları blokunda neft hasilatı həcmi bu gün yataqda platformanın işi dayandırılanadək qeydə alınan təqribən 900 min barelə nisbətdə sutkada 700 min barel təşkil edir.
"Azəri-Çıraq-Günəşli" yatağında Bakı-Tbilisi-Ceyhan boru kəməri ilə ixrac olunan Azeri Light növlü neft hasil edilir.
"BTC Co"nun səhmdarları bunlardır: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).
Məqalə müəllifi ilə əlaqə ünvanı - capital@trend.az
