Azərbaycan, Bakı, 07 mart / Trend , müxbir E.İsmaylov /
SOCAR-ın (Azərbaycan Dövlət Neft Şirkəti) yüksək vəzifəli nümayəndəsinin dediyinə görə, 2015-ci ildə Azərbaycanın "Şah-Dəniz" dəniz yatağının işlənməsinin ikinci fazası çərçivəsində Azərbaycan qazı çox yüksək qiymətlərlə satılacaq.
"Hazırda neftin qiymətində müşahidə olunan azalma və ona müvafiq olaraq təbii qazın da qiymətinin enməsi müvəqqəti haldır. Biz isə 2013-2015-ci illərdən danışırıq. Mən söz verə bilərəm ki, 2015-ci ildə Azərbaycan qazı çox baha qiymətlərlə satılacaq", - mənbə deyib.
SOCAR şirkətinin prezidenti Rövnəq Abdullayev "Şah-Dəniz" yatağının işlənməsinin ikinci mərhələsinə 2014-2015-ci illərdə başlanıla biləcəyini bildirib.
İkinci mərhələ çərçivəsində sözügedən yataqda neft hasilatının ümumi həcmi birinci mərhələdəki 9,6 milyard kub metrə qarşı 20 milyard kub metr təşkil edəcək.
Hazırda "Şah-Dəniz" yatağında ilk mərhələdə əldə olunan qazın həcmi sutka ərzində 23 mln. kub metrdən çoxdur.
SOCAR ikinci mərhələdə "Şah-Dəniz" yatağından əldə olunacaq qazın satışı barədə danışıqlar aparır. Danışıqlar Rusiya, Türkiyə, İran və Avropa ölkələri ilə aparılır.
"İlin sonuna qədər yekun qərar veriləcək", - məlumatı verən mənbə bildirib.
Azərbaycanın "Şah-Dəniz" yatağından birinci mərhələ ərzində əldə edilən qazın yekun həcmi 180 milyard kub metr təşkil edəcək.
"Şah-Dəniz" dəniz yatağının işlənməsi barədə müqavilə 1996-cı il 4 iyun tarixində imzalanıb. BP (operator) - 25,5% payla, Statoil Hydro - 25,5 payla, NICO - 10% payla, Total - 10% payla, LukAgip - 10% payla, ARDNŞ - 10% payla müqavilənin iştirakçılarıdırlar. "Şah-Dəniz" yatağında olan qaz ehtiyatının ümümi həcmi 1,2 trilyon kub metr civarında dəyərləndirilir.
Məqalə müəllifi ilə əlaqə ünvanı: [email protected]
