Azərbaycan, Bakı, 12 mart / Trend , müxbir A.Bədəlova /
ABŞ-ın Dövlət Enerji İnformasiyaları İdarəsi (EIA) 2010-cu ildə Amerikanın bir barel WTI markalı yüngül neftinin orta qiymətini 53 dollar səviyyəsində proqnozlaşdırır.
EIA-nın mart məruzəsində bildirilir ki, dünya iqtisadiyyatının düşməsi neftin qiymətinin iki dəfədən çox - 2008-ci ildə qeydə alınan bir barel üçün 100 dollardan 2009-cu ildə qeydə alınan 42 dollaradək azalmasına səbəb olub.
EIA-nın məruzəsində bildirilir ki, qısa müddətli perspektivdə dünya üzrə neft qiymətlərinin gələcək dinamikası əsasən dünya iqtisadiyyatının bərpa müddəti və tempindən asılı olacaq. EIA-nın gözləmələrinə görə, dünya iqtisadiyyatı 2009-cu ilin sonlarında bərpa olunmağa başlayacaq. Gələn il dünya üzrə ÜDM artımı 2,6 faiz proqnozlaşdırılır.
Çərşənbə axşamı, martın 10-da aparılan alqı-satqının nəticələrinə görə, Nyu-York Əmtəə Birjasında (NYMEX) apreldə tədarük olunacaq WTI-nin fyuçers qiyməti 1,36 dollar düşərək bir barel üçün 45,71 dollara çatıb.
Dövlət Enerji İnformasiyaları İdarəsi ABŞ-ın Enerji Departamentinin strateji agentliyidir, 1977-ci ildə Konqres tərəfindən yaradılıb.
Məqalə müəllifi ilə əlaqə ünvanı - [email protected]