Azərbaycan, Bakı, 25 may / Trend , müxbir E.İsmayılov /
Ukraynanın birgə istismar və emal işləri üçün SOCAR-a (Azərbaycan Respublikası Dövlət Neft Şirkəti) təklif etdiyi neft emalı zavodları (NEZ) şirkətin tələblərinə uyğun deyil. Bu barədə SOCAR-ın nümayəndəsi bildirib.
"Ukrayna birgə istismar üçün bizə bir neçə zavod təklif etsə də, onlar ölkə ərazisinin dərinliyində yerləşir. Bu bizi qane etmir. Nefti Ukraynanın dərinliyinə daşımaq, sonra neft məhsullarını təkrar dənizə doğru daşımaq sərfəli deyil", - mənbə qeyd edib.
Onun sözlərinə əsasən, SOCAR Ukrayna NEZ-lərində Azərbaycan neftini emal etmək niyyətindədir.
SOCAR-a dəniz kənarında yerləşən NEZ lazımdır ki, neft məhsularının istehsalı asan və ucuz başa gəlsin.
Şirkət Ukrayna ilə yalnız dəniz kənarında ərazi ayrıldıqda işləyə bilər.
Mənbənin sözlərinə görə, dünya maliyyə böhranı öz təsirini göstərsə də, SOCAR investisiya axtarışı ilə bağlı işlərini davam etdirir.
Ukraynanın Azərbaycandakı səfiri Boris Klimçukun əvvəllər dediyinə əsasən, dəniz kənarında NEZ inşası böyük texnoloji üstünlüklərə malikdir.
Ukraynada ildə 51,11 milyon ton neft emal etmək iqtidarında olan 6 NEZ fəaliyyət göstərir.
Məqalə müəllifi ilə əlaq ünvanı: [email protected]