Azərbaycan, Bakı, 03 iyun / Trend , müx. A.Bədəlova /
Azərbaycan enerji resurslarının təchizatçısı qismində böyük potensiala malikdir, çərşənbə günü Bakıda 16-cı Beynəlxalq Xəzər neft-qaz konfransında Almaniyanın İqtisadiyyat və Texnologiya Federal Nazirliyinin enerji siyasəti üzrə baş direktoru Detlef Dauk bildirib.
Daukun sözlərinə görə, Xəzər regionunun ölkələri nəinki Almaniyanın, həmçinin bütün Avropa İttifaqının vacib iqtisadi tərəfdaşına çevrilib.
Dauk bildirib ki, Azərbaycan və Almaniya arasında neft-qaz sektorunun əsas amil olduğu güclü iqtisadi əməkdaşlıq qurulub. Onun sözlərinə görə, Almaniya şirkətləri bu əməkdaşlığın gələcək inkişafında maraqlıdırlar.
Dauk qeyd edib ki, Almaniya Xəzər regionu və Avropa arasında körpünün yaranmasında maraqlıdır və "Cənub dəhlizi" layihəsini, o cümlədən "Nabukko" qaz borusunu tamamilə dəstəkləyir.
"Bu layihə Avropa iqtisadiyyatında yeni mərhələ açacaq və ölkələr arasında gələcək əməkdaşlıq üçün əsas olacaq", - o deyib.
