Azərbaycan, Bakı, 18 iyun / Trend , müxbir А.Bədəlova /
"Nabukko" qaz kəməri üzrə hökumətlərarası müqavilənin imzalanması tarixi yenidən ertələnib. Türkiyənin enerji və təbii resurslar naziri Taner Yıldız bildirib ki, sənəd iyul ayı ərzində imzalanacaq. Bir müddət əvvəl türk hökuməti onun iyunun 25-də imzalanacağını bildirirdi.
İmzalanma prosesində durğunluq barədə Macarıstanın "Nabukko"dakı xüsusi nümayəndəsi Mixay Bayer də bir müddət əvvəl danışmışdı. Ancaq o bildirirdi ki, buna baxmayaraq müqavilə 2009-cu ilin ilk yarısının sonuna qədər imzalanacaq.
Layihə üzrə konsorsium isə hələ ki, müqavilənin imzalanması üzrə konkret vaxt açıqlamır. Cümə axşamı Trend -a elektron poçtla "Nabukko" layihəsində OMV şirkətinin rəsmi mənbəsinin verdiyi məlumata görə, dəqiq tarix müəyyən edilməyib, "onun imzalanmasının iyulun ortalarına qədər ertələnməsini isə Türkiyə bəyan edib".
İmzalanmanın Ankarada baş tutacağı gözlənilir.
Mənbənin sözlərinə görə, müqavilə "Nabukko" layihəsinin iştirakçı ölkələrinin nazirləri arasında imzalanacaq.
"Hökumətlərarası müqavilənin imzalanması üzrə danışıqlar Avstriya, Macarıstan, Rumıniya, Bolqarıstan, Türkiyə və Avropa Komissiyası arasında aparılıb", - mənbə bildirib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək üçün nəzərdə tutulur. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir.
Layihənin ümumi dəyərinin təxminən 30 faizi layihədə iştirak payı əsasında Nabucco Gas Pipeline International-ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.
Hazırda layihə təfərrüatlı injinirinq mərhələsindədir.
Mənbənin sözlərinə görə, imzalanmadan sonrakı addım kəmər vasitəsilə qaz nəqli sifarişlərinin qəbulu "open season" porsesi olacaq. Layihə üzrə sərmayə ilə bağlı qərarın 2010-cu ilin ilk rübündə qəbul ediləcəyi gözlənilir.
Məqalə müəllifi ilə əlaqə ünvanı: [email protected]
