Azərbaycan, Bakı, 07 avqust / Trend , müxbir İ.Xəlilova /
İslam İnkişaf Bankı (İİB) avqustun 9-dan etibarən 780 meqavatlıq yeni Cənub stansiyasının (Əlibayramlı istilik stansiyasının yaxınlığında) inşası layihəsi üzrə məlumatın toplanması üçün ekspert qrupunu göndərir. Bu barədə cümə günü hökumətdən bildirilib.
"Avqustun 16-dək davam edəcək bir həftəlik səfər çərçivəsində İİB-in texniki və maliyyə ekspertləri layihənin maliyyələşdirilməsinin gələcək analizi məqsədilə onun haqqında lazımı məlumatları toplayacaq", - hökumətdən bildirilib.
Azərbaycan hökuməti layihənin maliyyələşdirilməsi üçün ərəb fondları ilə birgə 215 milyon avronun ayrılması xahişi ilə banka müraciət edib. Bununla əlaqədar olaraq İİB-in koordinasiya qrupu sözügedən məsələnin gələcək analizi məqsədilə məlumatın toplanması üçün ekspertlərin Azərbaycana göndərilməsi məsələsini nəzərdən keçirib və bu qərarı qəbul edib.
Azərbaycan tərəfi artıq bu ildə enerji layihəsinə əlavə xarici vəsaitin cəlb edilməsini istəyir, lakin bu İİB-dən və ərəb fondlarından asılı olacaq.
"Azərenerji" ASC ötən ildə Azərbaycanın AZENCO şirkəti ilə imzalanmış müqavilə əsasında elektrik stansiyasının tikinti işlərinə başlayıb, həmçinin avadanlığın bir hissəsi alınıb. Bu işlər üç bankın - Bayerische landesbank, Societe Generale və Credit Suisse banklarının konsorsiumu tərəfindən ayrılan 300 milyon avro məbləğində kredit hesabına həyata keçirilir. Kredit dövlət zəmanəti ilə 10 il müddətinə verilib.
Əvvəlcədən ehtimal olunurdu ki, bank konsorsiumunun kredit ehtiyatları stansiyanın inşası ilə əlaqədar işlərin həyata keçirilməsi üçün məbləğin yarısını ödəyəcək. Cənub stansiyası həm qaz, həm də mazutla işləyəcək. Qalan hissənin isə büdcə vəsaitlərinin hesabına ödənilməsi planlaşdırılırdı, lakin hökumət xarici borcların hesabına 215 milyon dollar cəlb etməyi qərara alıb ki, bu da İİB ilə müzakirələrin mövzusu olacaq.
Hazırda İİB Azərbaycandakı 280 milyon dollar dəyərindəki maliyyə layihələrini bəyənib. Azərbaycan İslam İnkişaf Bankı ilə 1991-ci ildən əməkdaşlıq edir və onun üzvüdür. Bankın kapitalında ölkənin iştirak payı 0,13 faiz təşkil edir.
İslam İnkişaf Bankı 1975-ci ildə təsis edilib, yarandığı gündən etibarən bankın kapitalı 15 dəfə artaraq iki milyard islam dinarından 30 milyard islam dinarına çatıb.
Məqalə müəllifi ilə əlaqə ünvanı: [email protected]
