Azərbaycan, Bakı, 12 avqust / Trend /
ARDNŞ (Azərbaycan Respublikası Dövlət Neft Şirkəti) yanvar-iyul aylarında "Bakı-Tbilisi-Ceyhan" (BTC) ixrac neft kəməri ilə təxminən 21 milyon ton Azərbaycan nefti nəql edib. Bu barədə çərşənbə günü ARDNŞ-dən yayılan məlumatda deyilir. Avqustun 1-nə olan məlumata görə, neft kəməri işləyəndən bəri ümumilikdə 91 milyon ton neft ixrac olunub.
İyulda neft kəməri ilə təxminən 3,2 milyon ton Azərbaycan nefti nəql edilib.
Yanvar-iyul aylarında Türkiyənin Ceyhan limanından dünya bazarına 21 milyon ton Azərbaycan nefti göndərilib. BTC boru kəmərinin işə başlamasından bəri avqustun 1-nə olan məlumata görə, Ceyhan limanından dünya bazarlarına təxminən 89,4 milyon ton Azərbaycan nefti göndərilib.
İyulda bu göstərici təxminən 3,5 milyon ton olub.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
BTC-nin tikintisi 4 mlrd. dollara başa gəlib. Bu tikinti işləri boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği 2,6 mlrd. dollar təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
