Azərbaycan, Bakı, 12 oktyabr / Trend , müxbir E.İsmayılov/
Abşeron yarımadasında 10 min hektar çirkli torpaq sahəsi var, ARDNŞ-ın ekologiya məsələləri üzrə vitse-prezidenti Muxtar Babayev deyib.
"Burada söhbət təkcə neftlə çirklənmiş torpaqlardan deyil, həmçinin ümumi çirklənməyə məriz qalan torpaqlardan gedir. ARDNŞ-in sahəsindən başqa burada başqa müəssisələrin fəaliyyət göstərdiyi bələdiyyə torpaqları da var", - Babayev deyib.
Babayevin sözlərinə görə, hazırda ARDNŞ Bibi Heybət, Balaxanı və Salyan yataqlarındakı tprpaqların təmizlənməsi üzrə işlər aparır. Keçən il şirkət tərəfindən 200 hektara yaxın torpaq sahəsi təmizlənib. Bu torpaqların böyük hissəsi Bibi Heybət və Balaxanı yataqlarının payına düşür.
Hazırda Azərbaycanda torpaqların təmizlənməsi mexaniki və bioloji təmizlənmə metodu ilə aparılır. Ölkədə mexaniki təmizlənmə üçün maşınlar çatışmadığı üçün ARDNŞ bioloji təmizləməyə üstünlük verir.
ARDNŞ həmçinin yataq sahələrinin köhnəlmiş metal konstruksiyalarından təmizlənməsi üzrə işlər görür. İlk növbədə istifadə edilməyən və ya istifadəsi təhlükə yaradan platforma və estakadalar sökülür. Hazırda "Qum adası" və "Neft daşları" neft-qaz çıxarma idarələrinin sahələrində bu istiqamətdə işlər aparılır. Aparılan işlərin böyük həcmi qədim Bibi Heybət yatağına ayrılıb.
ARDNŞ, vaxtaşırı yataq sahələrində radiasiya fonunun müəyyən edilməsi üçün ölçmələr aparır. Babayevin sözlərinə görə, radiasiya fonu şirkət işçiləri və sanaye yaxınlığında yaşayan insanlar üçün təhlükə yaratmır.
"Aparılan qiymətləndirmələr əsasında radiasiya fonu bizim əməkdaşlarımız işlədiyi yerlərdə normaldır. Qonşuluqda yaşayış məntəqələri yerləşən sahələrdə isə vaxtaşırı radiasiya fonunun dəyərləndirilməsi üzrə işlər aparılır, burada yaşayan əhali üçün də təhlükə yoxdur", - deyə o əlavə edib.
Məqalə müəllifi ilə əlaqə ünvanı: [email protected]
