Azərbaycan, Bakı, 16 oktyabr / Trend /
Xəzər dənizinin Azərbaycan sektorunda "Ümid" perspektivli qaz kondensat strukturunda ilk kəşfiyyat quyusunun qazılması çərçivəsində ARDNŞ (Azərbaycan Respublikası Dövlət Neft Şirkəti) tərəfindən 6,5 min metrlik layihə dərinliyinin 2 min metrdən artığı qazılıb, ARDNŞ şirkətinin "Kompleks qazma işləri" trestinin müdiri İsgəndər Şirəli "Vışka" qəzetinə verdiyi müsahibəsində deyib.
"Platformada yalnız milli mütəxəssislər işləyir. Onlar bütün işə hazırlıq mərhələrini keçiblər", - o qeyd edib.
"Hazırda kəşfiyyat quyularının qazılması çərçivəsində iki min metrdən artıq qazılıb", - Şirəli deyib.
Kəşfiyyat quyusunun qazılmasına avqustda başlanıb. Bu perspektivli struktur çətin geoloji və seysmik xüsusiyyətlərinə görə fərqlənir, əvvəllər mənbə deyib.
Bu, ARDNŞ-in son 15 ildə apardığı ilk müstəqil kəşfiyyat qazmasıdır. ARDNŞ-in geoloqları "Ümid" perspektivli strukturunda ehtimal edilən qaz ehtiyatını 300 milyard kubmetr, qaz kondensatı ehtiyatını isə 30-40 milyon ton həcmində dəyərləndirirlər.
Əvvəllər ARDNŞ kəşfiyyat quyularının da qazıldığı "ÜMİD-1" platformasının inşaatını başa çatdırıb. "Ümid-1" platforması tikintisi yarımçıq qalan "Çıraq-6" paltformasının əsasında tikilib, proqram çərçivəsində ən iri obyekt hesab edilir, onun hündürlüyü 72 metrdir. Platforma dənizin 58 metr dərinliyində "Bulla-dəniz" dəniz yatağının 15 kilometrliyində yerləşir. Ümumilikdə platformada 6 qaz quyusunun qazılması planlaşdırılır.
Məqalə müəllifi ilə əlaqə ünvanı: [email protected]