Azərbaycan, Bakı, 28 oktyabr / Trend /
Noyabrın sonunda Azərbaycanda ilk dəfə olaraq "Bakı şəhərində mərtəbələr arasındakı keçidlərin, dəhlizlərin, giriş qapıları və binaların, həyətyanı sahələrin günəş enerjisindən istifadə etməklə işıqlandırılması" pilot layihəsi başa çatacaq. Bu barədə Sənaye və Energetika Nazirliyinin mətbuat xidmətinin çərşənbə axşamı yaydığı məlumatda deyilir.
Bu layihə çərçivəsində işlərin tezliklə başa çatdırılması barədə qərar, çərşənbə axşamı layihənin Azərbaycan Sənaye və Energetika nazirliyində müzakirəsi zamanı verilib. Layihənin müzakirəsində ölkənin sənaye və energetika naziri Natiq Əliyev və Bakı şəhər İcra Hakimiyyətinin başçısı Hacıbala Abutalıbov iştirak edib.
Layihə Sənaye və Energetika Nazirliyinin sifarişi ilə hazırlanıb.
Pilot layihənin reallaşdırılması üçün paytaxtın İcra Hakimiyyətinə yaşayış binası ayrılıb. Həmin binanın damında hər biri 0,1 kilovat gücə malik 30 günəş batareyası yerləşdiriləcək. Bu batareyalar -40, +50 dərəcədə fəaliyyət göstərə bilir.
Layihədə göstərilən ərazilərin işıqlandırılması insanların hərəkəti ilə tənzimlənəcək.
Anoloji layihənin Sumqayıtda da reallaşdırılması planlaşdırılır. 2010-cu ildə bir neçə layihənin reallaşdırılması nəzərdə tutulur.
İl ərzində Azərbaycanda 2400-3200 günəşli saat olur. ABŞ və Mərkəzi Asiya ölkələrində bu göstərici 2500-3000, Rusiyada isə 500-2000 saat təşkil edir.
