Gürcüstan, Tbilisi, 25 fevral / Trend , müxbir N.Kirsxaliya/
ABŞ Gürcüstanda iki enerji layihəsinin həyata keçirilməsinə 110 milyon dollar ayıracaq. Bu məsələ cümə axşamı Tbilisidə ABŞ və Gürcüstan arasında strateji əməkdaşlıq haqqında Xartiya çərçivəsində yaradılan iqtisadi işçi qrupunun işi çərçivəsində imzalanan sazişdə nəzərdə tutulur.
Sənədi Amerika tərəfindən ABŞ nümayəndə heyətinin rəhbəri, ABŞ dövlət katibinin iqtisadiyyat və biznes məsələləri üzrə köməkçisi Xose Fernandes imzalayıb.
Gürcüstanın maliyyə naziri Kaxa Bainduraşvili jurnalistlərə bildirib ki, saziş çərçivəsində Potidə qaz kəmərinin çəkilişinə 80 milyon ayrılacaq.
"Bu, bizim üçün çox mühüm layihədir. Çünki hazırda biz Potidə azad iqtisadi zonanı inkişaf etdiririk və sənaye istehsalının artırılması üçün orada qaz infrastrukturunun yaradılması vacibdir", - o vurğulayıb.
İkinci layihə Qərbi Gürcüstanda Senaki elektrik şəbəkəsinin inkişafına yönəlib. Regionda elektik təsərrüfatının reabilitasiyası 30 milyon dollara başa gələcək.
Fernandes bildirib ki, ABŞ iki ölkə arasında imzalanmış Xartiya çərçivəsində Gürcüstanda əməkdaşlığı davam etdirməyə hazırdır və tərəflərin hər biri öz üzərinə götürdüyü öhdəlikləri yerinə yetirməlidir.
