Azərbaycan, Bakı, 31 mart / Trend , müxbir E.İsmayılov/
Son 10 il ərzində neft-qaz layihələri çərçivəsində ölkədə işləyən vergiödəyiciləri Azərbaycanın dövlət büdcəsinə 8 milyard manatdan çox vergi ödəyib. Bu barədə Xüsusi Rejimli Vergi Xidməti Departamentinin şöbə müdiri Zaur Fətizadə "Vergilər" qəzetinə verdiyi müsahibəsində bildirib.
Fətizadənin sözlərinə görə, "Bakı-Tbilisi-Ceyhan" əsas ixrac boru kəmərinin məhsul bölgüsü haqqında müqavilə və digər bu kimi müqavilələr çərçivəsində işləyən vergiödəyiciləri tərəfindən ödənişlər edilib.
ARDNŞ prezidenti Rövnəq Abdullayevin bir müddət əvvəl bildirdiyi kimi, 1994-cü ildən Azərbaycanda məhsul bölgüsü haqqında 26 müqavilə imzalanıb. Bu vaxt ərzində respublikanın neft-qaz sənayesinə 37 milyard dollardan çox sərmayə qoyulub.
Bu gün ölkədə neft-qaz sahəsində 34 şirkət işləyir, onlardan 15-i dünya ölkələrini təmsil edir.
Onlarla əməkdaşlıq "Azəri-Çıraq-Günəşli" və "Şahdəniz" yataqlarının işlənməsinə, "Bakı-Tbilisi-Ceyhan" neft kəmərinin inşasına, Cənubi Qafqaz qaz kəməri və digər böyük layihələrin həyata keçməsinə imkan verib.
