Azərbaycan, Bakı, 2 aprel /Trend/
İmzalanması bu ilin yazında gözlənilən uzunmüddətli müqavilənin həyata keçirilməsi çərçivəsində Azərbaycan qazının İrana tədarükünün artırılması üçün Astarada (Azərbaycan) yeni qaz kompressor stansiyası yaradılacaq. Bu barədə neft-qaz sənayesinin mənbəsi cümə günü deyib.
Bu stansiyanın tikintisinin başa çatdırılması ilə tədarük edilən qazın təzyiqi 75 atmosferədək artacaq ki, bu da Azərbaycan yanacağının İrana tədarükü həcminin artmasına imkan verəcək. Bunun üçün Azərbaycan və İran arasındakı qaz kəmərlərinin müxtəlif hissələrində təmir və yenidənqurma işləri həyata keçirilir.
Hazırda Azərbaycandan İrana nəql edilən qazın həcmi sutkada 14 milyon kubmetr təşkil edir və qaz həcminin hamısı svop əməliyyatı çərçivəsində Naxçıvan Muxtar Respublikasının tələbatını ödəmək üçün tədarük edilir.
Bu ilin yazına kimi ARDNŞ (Azərbaycan Respublikası Dövlət Neft Şirkəti) İrana qaz tədarükü üzrə uzunmüddətli müqavilə imzalamaq niyyətindədir. İran nümayəndəsinin daha əvvəl bildirdiyi kimi, İran Azərbaycandan 5 milyard kubmetrədək qaz almağa hazırdır.
Azərbaycan və İranı uzunluğu 1474,5 km olan "Qazıməmməd - Astara - Bind-Biand" qaz kəməri birləşdirir. Qaz kəmərinin Azərbaycan ərazisindəki hissəsinin uzunluğu 296,5 kilometrdir. Onun buraxılış gücü ildə 10 mlrd kubmetrdir. Bu marşrut 1971-ci ildə istismara verilən Qazax - Astara - İran boru kəmərinin qoludur. Onun üzərində Qazıməmməd, Ağdaş və Qazaxda üç kompressor stansiyası tikilib. Qaz nəqliyyatı sistemi 55 atmosfer təzyiqinə hesablanıb. Boru kəmərinin diametri 1200 mm-dir.
