Azərbaycan, Bakı, 5 aprel /Trend, müxbir E.İsmayılov/
Ənənəvi enerji resursları ixracatçısı olan Azərbaycanın alternativ və bərpa olunan enerji mənbələrinə keçmək üçün kifayət qədər vaxtı var. Bunu bazar ertəsi Bakıda alternativ enerji mənbələrinə həsr olunmuş konfransda Ümumdünya Alternativ Enerji Şurasının rəhbəri German Şeer deyib. O, həm də ümumdünya alternativ enerji agentliyinin yaradılmasının təşəbbüskarı və Almaniya Bundestaqının üzvüdür.
Şeerin sözlərinə görə, hazırda Azərbaycan karbohidrogen ixracatçısı kimi çıxış edir ki, bu da alternativ enerji mənbələrinin inkişafı üçün şərait yaradır.
İndiki halda söhbət ondan gedir ki, neft-qaz ixracatçısı olan ölkələr həm özlərinin enerjiyə olan tələbatını təmin edir, həm də gəlir əldə edərək onu ixrac edir. Məhz buna görə belə ölkələr qrupu qeyri-ənənəvi enerji mənbələrinin inkişafı üçün böyük imkanlara malikdir. Çünki ənənəvi enerji mənbələriin idxalı özü-özlüyündə böyük xərc tələb edir.
"Hazırda Azərbaycan enerji resurslarının ixracatçısı kimi çıxış edir və alternativ enerji mənbələrinə keçmək üçün hazırlığa çox vaxtı var", - Şeer deyib.
Onun sözlərinə görə, alternativ və bərpa olunan enerji mənbələrinin inkişafı zamanı bütün xərclər layihələrin texnoloji hissəsinə yönəldilir. Lakin ehtiyatların məhdudluğu ilə əlaqədar tədricən tükənən ənənəvi enerji növlərindən fərqli olaraq, alternaiv enerjini təbiət bəxş edir. "Zəruri texnologiyaların qiymətlərinin azalması alternativ enerji mənbələrindən kütləvi istifadəyə gətirib çıxaracaq", - Şeer bildirib.
