Azərbaycan, Bakı, 12 may /Trend, müxbir E.İsmayılov/
İsveçrə Azərbaycana alternativ və bərpa olunan enerji mənbələri sahəsində əməkdaşlıq təklif edir. Bu barədə çərşənbə günü Bakıda energetika sahəsi üzrə İsveçrə federal ofisinin direktoru Valter Steynman bildirib.
"Biz Azərbaycanı günəş batareyası istehsalı və xırda hidroelektrostansiyalar sahəsində əməkdaşlığa çağırırıq. Həmçinin bizdə enerji istehsalında biokütlədən hazırlanmış müəyyən nou-hau var", - Steynman bildirib.
Onun sözlərinə görə, İsveçrə tərəfi yaşayış sahəsində enerji istifadəsini azaltmaq üzrə yeni qaydalar və gənc mühəndislərin öyrədilməsi sahəsində də əməkdaşlıq təklif edir.
Azərbaycanın Sənaye və Energetika Nazirliyi nəzdində Alternativ və bərpa olunan enerji mənbələri üzrə Agentliyin rəhbəri Akim Bədəlovun sözlərinə görə, gələcəkdə İsveçrə təcrübəsi əsasında günəş batareyası üçün panelləri istehsal edən zavodun tikilməsi nəzərdə tutulur.
"Azərbaycan alternativ və bərpa olunan enerji mənbələrinin istehsalı və inkişafı üzrə sahələrdə inkişaf etmiş Avropa ölkələrindən təcrübələr götürə bilər", - Azərbaycanın sənaye və energetika nazirinin müavini Natiq Abbasov deyib.
