Azərbaycan, Bakı, 8 iyun /Trend/
Yanvar-may aylarında "Bakı-Tbilisi-Ceyhan" (BTC) ixrac neft kəməri ilə 15,1 milyon ton Azərbaycan nefti nəql olunub. Bu barədə çərşənbə axşamı ARDNŞ-nin məlumatında deyilir. 2010-cu il iyunun 1-nə olan məlumata görə, neft kəmərinin işə düşməsindən etibarən kəmər vasitəsilə 120,7 milyon ton neft nəql olunub.
Məlumatda deyildiyi kimi, may ayında BTC ilə 3,2 milyon ton Azərbaycan nefti nəql olunub.
Yanvar-may aylarında Türkiyənin Ceyhan limanından dünya bazarlarına 15 milyon ton Azərbaycan nefti göndərilib. "Bakı-Tbilisi-Ceyhan" neft kəmərinin işə başlamasından bəri, iyunun 1-nə olan məlumata görə, Ceyhandan dünya bazarlarına 119,6 milyon ton Azərbaycan nefti göndərilib.
Məlumatda deyildiyi kimi, may ayında Ceyhandan dünya bazarına 3,5 milyon ton neft göndərilib.
BTC neft kəmərinin ümumi uzunluğu 1768 km-dir. Bunun 443-ü Azərbaycan, 249-u Gürcüstan, 1076 km-i isə Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə 2005-ci il mayın 18-də başlayıb.
BTC-nin tikintisi 4 mlrd. dollara başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği 2,6 mlrd. dollar təşkil edir.
BTC-nin səhmdarları - BP (30,1%), AzBTC (25%), Chevron (8,9%), Statoil (8,71%), ТРАО (6,53%), Eni (5%), Total (5%), Itochu (3,4%), Inpex (2,5%), ConocoPhillips (2,50%) və Hess (2,36%).