Azərbaycan, Bakı, 30 iyun /Trend/
Beş ay ərzində ARDNŞ-nin "Neft Daşları" Neft-Qaz Çıxarma İdarəsi fəaliyyətsiz fondda olan quyularda texniki tədbirlər aparmaqla 11 quyunu istismara qaytarıb. Bu barədə ARDNŞ-nin çərşənbə günü yayılan məlumatınfda qeyd olunub.
Məlumata görə, hazırkı mərhələdə bu quyulardan 4059 ton neft hasil edilir.
Bu günlərdə təmirdən sonra "Neft Daşları" yatağındakı 741-ci özüldə quyu əsaslı təmirdən sonra istismara daxil edilib. Hazırda quyulardan 1351-1338 metr intervalla sutkada təxminən 3 ton neft hasil edilir.
Əvvəllər ARDNŞ prezidenti Rövnəq Abdullayevin dediyi kimi, "Neft Daşları" neft-qaz yatağının hasil olunan ehtiyatları 182 milyon ton nefti ötür. Bu yatağın geoloji ehtiyatlarının həcmi 365 milyon ton təşkil edir. "Neft Daşları" yatağının mənimsənilməsi üzrə işlər qüvvədə olan layihəyə əsasən 2035-ci ildə başa çatmalıdır.