Azərbaycan, Bakı, 29 iyul /Trend, müxbir E.İsmayılov/
"Azersun Holding" ilin sonunadək Biləsuvarda heyvan gübrələri və ekoloji təmiz qida məhsullarının istehsalı üzrə sənaye kompleksini istismara verməyi planlaşdırır. Bu barədə cümə axşamı holdinqin rəhbəri Abdulbari Gözəl məlumat verib. Kompleks 20 min kvadratmetrlik sahəni əhatə edir.
Onun sözlərinə görə, zavodda kimyəvi əlavələr olmadan tərəvəz, heyvanlar üçün yem, ekoloji təmiz süd və ət emal olunacaq.
Niderlandın təcrübəsindən istifadə olunmaqla, layihənin işlənməsi ilə hind və rusiyalı mütəxəssislər məşğul olublar.
Kompleksin istehsal gücü 30 min ton gübrə və ildə ən azı 100 min ton qida məhsulu olacaq.
"Azersun Holding" 1992-ci ildə yaradılıb. Holdinqin fəaliyyət sahələri çay, bitki yağlarının emalı və çəkilib qablaşdırılması, ticarət və distribüterlik, inşaat, bank işi, sığorta, karton-kağız məmulatlarının, ət və tərəvəz konservlərinin istehsalı, yüklərin daşınması, saxlanması və s.-dən ibarətdir.
