Azərbaycan, Bakı, 31 iyul /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) indiyədək yeraltı qaz anbarlarına 1,9 milyard kubmetr qaz vurub. Bu barədə şənbə günü neft-qaz bazarındakı mənbə məlumat verib.
Hazırda respublikada iki yeraltı qaz anbarı - Qaradağ və Qalmaz fəaliyyət göstərir. Mənbənin sözlərinə görə, qazın vurulması prosesi hələ davam edir, lakin yeraltı qaz anbarlarına artıq 1,9 milyard kubmetrdən çox qaz vurulub.
2010-cu ildə Azərbaycanın yeraltı qaz anbarlarında qaz ehtiyatlarının həcmi üç milyard kubmetr təşkil edəcək. Ötən il bu göstərici 2008-ci ildəki 1,4 milyard kubmetrə qarşı 2 milyard kubmetrə yaxın olub.
ARDNŞ-nin məlumatına görə, keçən il Qalmaz yeraltı qaz anbarına 507,7 milyon kubmetr, Qaradağ anbarına isə 794,9 milyon kubmetr qaz vurulub.
Payız-qış mövsümündə istifadə etmək üçün Azərbaycanın yeraltı qaz anbarlarına qazın vurulması prosesi oktyabrda başa çatacaq.