Azərbaycan, Bakı, 6 avqust /Trend/
Yaradılmasının təşəbbüskarı İran olan neft-kimya məhsulları ixracatçıları ölkələrinin Forumuna (Petrochemical Exporting Countries Forum - PECF) Rusiya, Türkiyə, Səudiyyə Ərəbistanı, Qətər, Birləşmiş Ərəb Əmirlikləri kimi ölkələr qəbul edilə bilər. Bu barədə İranın neft naziri Əbdülhüseyn Bayat deyib. Xəbəri SHANA agentliyi yayıb.
Bayatın sözlərinə görə, bu Forumun layihəsi İranın Milli Neft-Kimya Sənayesi Şirkəti tərəfindən hazırlanıb və ölkənin ali dini rəhbərinin ofisinə təklif şəklində təqdim edilib.
"Hazırda layihə üzərində iş aparılır", - Bayat qeyd edib.
Bayatın fikrincə, PECF-in yaradılması regionun kimya sənayesində əməkdaşlığa imkan verəcək sənədin hazırlanmasına şərait yaradacaq.
Forumun başlıca məqsədi neft-kimya sahəsində müxtəlif məsələlərin maliyyə və texniki tərəflərinin müzakirəsi, onların qiymətləndirilməsi, istehsal siyasətinin və istehsal texnologiyasının seçilməsindən ibarətdir.
