Azərbaycan, Bakı, 12 avqust /Trend/
Son günlər havaların normadan artıq isti keçməsi ilə əlaqədar, abonentlərin soyuducu vasitələrdən fasiləsiz istifadə etmələri Bakının elektrik şəbəkələrinin ifrat yüklənməsinə səbəb olub. Bu barədə "Bakıelektrikşəbəkə" ASC-nin cümə axşamı yayılan məlumatında deyilir. Sərinləmə qurğularından istifadə havanın yüksək temperaturda olması ilə əlaqədardır.
Məlumatda deyildiyinə görə, buna baxmayaraq, aparılan yenidənqurma işləri abonentlərin fasiləsiz və keyfiyyətli elektrik enerjisi ilə təmin olunmasına şərait yaradır.
Elektrik enerjisi istehlakının artmasına baxmayaraq, abonentlər tərəfindən ödənişlərin müntəzəm aparılmaması son iki ayda borcların yaranmasına səbəb olub. "Bakıelektrikşəbəkə" ASC abonentlərdən istifadə etdikləri elektrik enerjisinə görə yaranmış borclarının tam şəkildə ödənilməsini xahiş edir. Artıq borclu abonentlərə müvafiq xəbərdarlıq bildirişləri göndərilib. Ödəniş müddəti keçən, həmçinin, "Bakıelektrikşəbəkə" ASC-nin fəaliyəti dövründə debitor borcu yaranmış abonentlərin elektrik enerjisi təchizatı avqustun 17-də saat 12:00-dək müvafiq qanunvericliyə uyğun olaraq qeyd-şərtsiz və fərdi qaydada dayandırılacaq.
