Azərbaycan, Bakı, 17 avqust /Trend, müxbir E.İsmayılov/
Yanvar-iyul aylarında ARDNŞ (Azərbaycan Respublikası Dövlət Neft Şirkəti) Gürcüstan bazarında 217,24 min tona yaxın neft məhsulları satıb. Ötən ilin yanvar-iyulunda bu rəqəm 232 min ton təşkil edib. Bunu çərşənbə axşamı ARDNŞ-in Gürcüstanda törəmə müəssisəsi olan "SOCAR Energy Georgia"dakı mənbə deyib.
Mənbənin sözlərinə görə, yanvar-iyulda satılan neft məhsullarının ümumi həcmindən 89,78 min tona yaxın benzinin, 105,76 min tona yaxın dizel yanacağının, 14 min tona yaxın aviasiya kerosininin, 765 ton mazutun, 6,51 min ton bitumun və 413 ton sürtkü yağının payına düşüb.
Bir müddət əvvəl mənbənin verdiyi məlumata görə, 2010-cu ildə ARDNŞ Gürcüstan bazarında 412 min ton neft məhsulu satmağı planlaşdırır. 2009-cu ildə bu göstərici 406 min tondan çox olub. Ötən ilin göstəricisindən geridə olmağa baxmayaraq, ilin yekunlarına görə plan üzrə qoyulan həcmə çatmaq və onları ötmək planlaşdırılıb.
Azərbaycanda neft məhsulları Bakıda iki NEZ-də istehsal olunur. NEZ-lərin ümumi gücü ildə 20 milyon ton neftdir. Hər iki zavod ARDNŞ-nin tərkibinə daxildir. ARDNŞ hər il öz vəsaitləri hesabına quru və dəniz yataqlarında hasil edilən altı-yeddi milyon tona yaxın nefti emal edir.
Ötən il Bakı NEZ-ləri tərəfindən 6,03 milyon ton neft emal olunub. 2008-ci ildə bu göstərici 7,35 milyon ton təşkil edib. 2010-cu ildə şirkət özünün iki neft emalı zavodunda 6,15 milyon tona yaxın neft emal etməyi planlaşdırır.
Bu ilə emalı planlaşdırılan ümumi həcmdən 4,35 milyon ton emal üçün Heydər Əliyev adına Bakı Neft Emalı Zavoduna, 1,8 milyon ton isə "Azneftyağ" NEZ-ə göndəriləcək.