Аzərbaycan, Bakı, 20 avqust /Trend, E. İsmayılov/
Bosniyanın qaz distribüteri "BH-Gas" Türkiyənin dövlət boru kəməri şirkəti "Botaş"a "Nabucco" qaz kəmərinə bitişik boru kəmərinin inşasına kömək etməyi xahiş edib, "Energy Intelligence" agentliyi Bosniya şirkətinin baş meneceri Almir Bekarevikə istinadən yazıb.
Botaş şirkəti "Nabucco" konsorsiumunun üzvüdür.
Hazırda "BH-Gas" Rusiyadan qonşu Serbiya vasitəsilə ildə 300 milyon kubmetr qaz alır.
"Nabucco" 31 milyard kubmetr həcmində Xəzər və Yaxın Şərq qazının Avropaya Türkiyə vasitəsilə nəqli üçün nəzərdə tutulub.
Dəyəri 7,9 milyard avro olan "Nabucco" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 milyard kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Bekarevikin dediyi kimi, Bosniya həm "Cənub axını", həm də "Nabucco"ya çıxış əldə etməyi labüd sayır.
Layihənin gerçəkləşdirilməsinin birinci mərhələsində qazın əsas tədarükçüləri Azərbaycan və İraq hesab olunur ki, onlardan müvafiq olaraq 8-10 və 8 milyard kubmetr həcmində qaz gözlənilir.
Bosniya, həmçinin, Xəzər qazının Avropaya nəqli üçün istiqamətlənmiş bir neçə mümkün variantlardan biri olan Transadriatik qaz kəməri vasitəsilə də qaz ala bilər.
