Türkmənistan, Aşqabad, 30 avqust /Trend, müxbir H.Həsənov/
Bazar ertəsi Türkmənistan və Əfqanıstan Kabildə ticari-iqtisadi əməkdaşlıq üzrə hökumətlərarası komissiya çərçivəsində ikigünlük danışıqlara başlayıblar. Bu barədə rəsmi türkmən mənbələri xəbər verir.
Müzakirələrin əsas mövzuları arasında birgə layihələrin, eləcə də Türkmənistan-Əfqanıstan-Pakistan-Hindistan (TAPI) transmilli qaz kəmərinin və enerji təchizatı obyektlərinin tikintisinin həyata keçirilməsi perspektivləri var.
Ötən həftə bu layihə İslamabadda müzakirə olunmuşdu. Orada ticari-iqtisadi əməkdaşlıq üzrə Türkmənistan-Pakistan hökumətlərarası komissiyasının növbəti iclası keçirilmişdi. Türkmənistan tərəfdən komissiyaya Baş nazirin müavini, xarici işlər naziri Rəşid Merelov başçılıq edib.
Türkmən KİV-in verdiyi məlumata görə, Pakistan tərəfi bir daha Türkmənistanın təşəbbüskarı olduğu mühüm sosial, siyasi və iqtisadi əhəmiyyətli və bütün regionun xalqlarına firavanlıq gətirmək məqsədi daşıyan bu beynəlxalq layihənin həyata keçirilməsində öz yüksək marağını təsdiqləyib.
Avqustun əvvəllərində Aşqabadda TAPI layihəsinin iştirakçısı olan ölkələrin nümayəndələri layihənin tezliklə həyata keçirilməsinin mühümlüyünü və birgə səylərin fəallaşdırılmasının vacibliyini qeyd ediblər. Bu, həmin iri layihənin texniki işçi qrupunun növbəti iclası zamanı qeyd olunub.
Asiya İnkişaf Bankının maliyyələşdirdiyi layihənin dəyəri 3,3 milyard dollar, layihə gücü isə ildə 30 milyard kubmetr təbii qaz təşkil edir. Qaz alıcıları olan Pakistan və Hindistanın qaz şirkətləri son vaxtlar ikiqat artıq həcmdə qaz almaq niyyətində olduqlarını bəyan ediblər.
2009-cu ildə İtaliyanın "Eni" konserni Türkmənistana uzunmüddətli perspektivdə enerjidaşıyıcılarının Hindistan bazarlarına çıxışı üçün yardım təklif edib.
