Azərbaycan, Bakı, 31 avqust /Trend, müxbir E.İsmayılov/
Xəzərin Azərbaycan sektorunda "Ümid" perspektiv dəniz strukturunda kəşfiyyat quyusunun dərinliyi layihələşdirilən 6500 metrdən 5200 metri keçir. Bu barədə çərşənbə axşamı ARDNŞ-dəki mənbə bildirib. Şirkət kəşfiyyat qazmalarını öz vəsaitləri hesabına görür.
"Qazma işləri normal gedir və indi kəşfiyyat quyusunun dərinliyi 5200 metri ötür", - mənbə qeyd edib.
Onun sözlərinə görə, yeni quyunun qazılması çox güman ki, gələn ilin əvvəlində başa çatacaq.
Bundan əvvəl 1980-1990-cı illərdə strukturda artıq kəşfiyyat-qazma işləri aparılıb. Strukturda doqquz quyu qazılıb, onların hamısı üzən qazma qurğularda qazılıb. Yeni kəşfiyyat quyusunun qazılması ARDNŞ tərəfindən "Ümid-1" platformasından aparılır. O, tikintisi tamamlanmayan "Çıraq-6" platformasının bazasında tikilməklə, proqram çərçivəsində ən böyük obyektdir. Onun hündürlüyü 72 metr təşkil edir. Platforma 58 metr dərinlikdə "Bulla-Dəniz" yatağının 15 kilometrliyində yerləşir. Ümumilikdə platformadan altı qaz quyusu qazmaq planlaşdırılır.
Bu, ARDNŞ-nin son 15 il ərzində müstəqil şəkildə həyata keçirdiyi ilk kəşfiyyat-qazma işidir. "Ümid" strukturunun mümkün ehtiyatları ARDNŞ geoloqları tərəfindən 200 milyard kubmetr qaz və 30 milyon ton kondensat həcmində qiymətləndirilir.
ARDNŞ tərəfindən kəşfiyyat quyusunun qazılması prosesi "Ümid-1" platformasında aparılır. "Ümid" ARDNŞ-nin xüsusi qaz ehtiyatlarını genişləndirməyi planlaşdırdığı perspektiv strukturlardan biridir.
