Azərbaycan, Bakı, 2 oktyabr /Trend, müxbirlər E.İsmayılov, A.Axundov/
"Nabukko" qaz kəmərinin səhmdarları ildə 31 milyard kubmetr Xəzər və Yaxın Şərq qazını Türkiyə vasitəsilə Avropaya nəql edə biləcək qaz kəmərinin tədarükü məsələlərini müzakirə etmək üçün səyləri birləşdirə bilərlər. Bu barədə "Energy Intelligence" "Nabukko" layihəsinin əsas iştirakçılarından olan Avstriyanın "OMV" şirkətinin rəhbəri Verner Auliyə istinadən yazır.
"Biz planların həyata keçirilməsi üçün alış üzrə səylərimizi birləşdirə bilərik, - Auli qeyd edib. - Hesab edirik ki, bu, prosesi gücləndirəcək".
Aulinin sözlərinə görə, "Nabukko"nun məqsədi Azərbaycandan minimum səkkiz milyard kubmetrdən 10 milyard kubmetrə qədər və İraqdan 10 milyard kubmetr və ya da daha çox qaz almaqdır.
"Sonra "Nabukko" layihəsi tezləşəcək", - o qeyd edib.
Onun sözlərinə görə, səylərin birləşdirilməsi ilə bağlı qərar yaxın aylarda qəbul oluna bilər.
"Tədarüklər təmin edilən zaman "Nabukko" layihəsinin maliyyələşməsi məsələsi də həll ediləcək", - Auli bildirib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. Boru kəmərinin maksimal gücü 31 milyad kubmetr təşkil edir. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.