Azərbaycan, Bakı, 29 noyabr /Trend/
ARDNŞ (Azərbaycan Respublikası Dövlət Neft Şirkəti) "Neft Daşları" dəniz yatağında yeni quyunu istismara verib. Bu barədə bazar ertəsi ARDNŞ-nin yaydığı məlumatda deyilir.
Kompleks Qazma İşləri Trestinin "Bayıl Limanı" Dəniz Kəşfiyyat Qazma İşləri İdarəsi "Neft Daşları" yatağındakı 1887-ci özüldə 2279 nömrəli quyuda qazma işlərini başa çatdırıb. "Neft Daşları" NQÇİ-nin sifarişi ilə Fasilə lay dəstəsinə qazılmış quyu 2375-2362 metr intervaldan sutkada 43 ton neft hasilatı ilə işləyir.
ARDNŞ prezidenti Rövnəq Abdullayevin bir müddət əvvəl dediyi kimi, Azərbaycanın "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq, "Neft Daşları" yatağının işlənməsi 2035-ci ildə başa çatmalıdır.
