Azərbaycan, Bakı, 30 noyabr /Trend, müxbir E.İsmayılov/
Xəzərin Azərbaycan sektorundakı perspektiv qaz-kondensatı strukturu "Abşeron"da kəşfiyyat quyusunun qazılmasına bu il dekabrın 22-də başlanılacaq. Bu barədə çərşənbə axşamı ARDNŞ-nin birinci vitse-prezidenti Xoşbəxt Yusifzadə deyib.
Onun sözlərinə görə, qazma "Maersk Drilling" şirkətinin idarəetməsində olan Heydər Əliyev adına qazma qurğusundan aparılacaq.
"Hazırda qazma qurğusu kəşfiyyat qazmasının aparıldığı Xzəərin Qazaxıstan sektorundadır", - Yusifzadə deyib.
ARDNŞ (Azərbaycan Respublikası Dövlət Neft Şirkəti) geoloqlarının qiymətləndirmələrinə görə, "Abşeron" strukturunun ehtiyatları 300 milyard kubmetr qaz və 45 milyon ton kondensat ola bilər.
"Abşeron" bloku Bakıdan 100 kilometrlik məsafədə dənizin 500 metr dərinliyində yerləşir.
"Abşeron" layihəsinin iştirakçıları: ARDNŞ - 40 faiz, Fransanın TOTAL şirkəti - 40 faiz , "Gaz De France Suez" - 20 faiz.
"Abşeron" strukturu üzrə müqavilə 2009-cu il fevralın 27-də ARDNŞ və TOTAL arasında imzalanıb. TOTAL daha sonra müqavilədəki iştirak payının 20 faizini "Gaz De France Suez" şirkətinə verib.
Xarici şirkətlər artıq ikinci dəfədir ki, "Abşeron" perspektiv strukturunda ticari cəlbedici karbohidrogenlərin hasilatına başlamağa cəhd edirlər. 1997-ci ildə layihədə 50 faizlik iştirak payı əldə edən ARDNŞ ilə ABŞ-ın "ChevronTexaco" (şirkət iştirak payının 30 faizini layihənin operatoruna verib) və TOTAL arasında bu sahənin işlənməsi və kəşfiyyatına dair PSA tipli ilk müqavilə imzalanıb. Lakin kəşfiyyat quyusunun qazılmasından sonra yataqda aşkar edilmiş ehtiyatlar kommersiya baxımından cəlbedici olmadığından müqavilə yekunlaşıb.
