Azərbaycan, Bakı, 30 noyabr /Trend, müxbir E.İsmayılov/
Bu ilin üçüncü rübü ərzində Bakı-Tbilisi-Ərzurum qaz kəməri ilə (Cənubi Qafqaz qaz kəməri) sutkada orta hesabla 15,3 milyon kubmetr qaz (96 min bareldən artıq neft ekvivalentində) nəql olunub. Bu barədə "ВР Azerbaijan" şirkətinin üç rübün yekunları üzrə çərşənbə axşamı yaydığı hesabatda deyilir.
Ötən il Bakı-Tbilisi-Ərzurum qaz kəməri ilə (Cənubi Qafqaz qaz kəməri) sutkada orta hesabla 15 milyon kubmetrə yaxın qaz (92 min bareldən artıq neft ekvivalentində) nəql olunub.
Hesabatda deyildiyi kimi, bu layihə çərçivəsində əsaslı xərclər yeddi milyon dollar təşkil edib. Cari ildə isə 12,7 milyon dollar səviyyəsində proqnozlaşdırılır.
2009-cu Bakı-Tbilisi-Ərzurum qaz kəməri ilə 5,2 milyard kubmetr qaz nəql olunub. 2008-ci ildə bu göstərici 4,7 milyard kubmetr təşkil edib.
Bakı-Tbilisi-Ərzurum kəmərinin (Cənubi Qafqaz boru kəməri) uzunluğu 700 kilometrdən çoxdur. Xəzər dənizinin Azərbaycan sektorundakı "Şahdəniz" qaz-kondensat yatağında hasil olunan qaz bu kəmər vasitəsilə nəql olunur və Gürcüstan vasitəsilə Türkiyəyə daşınır. Azərbaycan da qaz alıcısı kimi iştirak edir.
