Azərbaycan, Bakı, 8 dekabr /Trend/
Ərzurum şəhəri yaxınlığında Bakı-Tbilisi-Ceyhan kəmərinin Türkiyəyə aid hissəsində neft sızması səbəbindən kəmərlə neftin nəqli müvəqqəti dayandırılıb. Bu barədə çərşənbə günü ВР (Azərbaycan və Gürcüstan ərazisində boru kəmərinin operatoru) şirkətindən məlumat verilib.
ВР-dən deyildiyi kimi, "Botaş" şirkəti boru kəmərində sızmanın aradan qaldırılması üçün neftin nəqlinin dayandırılması xahişi ilə müraciət edib. "Botaş"da hesab edirlər ki, sızma boru kəmərinə qanunsuz müdaxilə nəticəsində baş verə bilər. Nöqsan aradan qaldırıldıqdan dərhal sonra təmir işlərinə başlanılacaq. Bir qayda olaraq, bu işlər çox vaxt aparmır.
ВР-dən deyildiyi kimi, nəqlin dayandırılması şirkətin əməliyyatlarına təsir etməyəcək. Xəzərin Azərbaycan sektorundakı "Azəri-Çıraq-Günəşli" yataqlar blokundan neft hasilatı davam etdirilir. Neft Bakıdan Səngəçal neft terminalına göndərilir. Ceyhanda terminaldan neftin yüklənməsi də plan üzrə davam etdirilir. Daşınmanın dayandırılması digər marşrutlarda nəqlə təsir etməyib.
Dekabrın 1-nə olan məlumata görə, 2006-cı il iyunun 2-dən noyabrın 1-dək qeydə alınan 1,04 milyon barelə qarşı Ceyhan terminalında Bakı-Tbilsi-Ceyhan kəməri ilə daxil olan 1,064 milyon barel neft yüklənib boşaldılıb.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.
BTC-nin tikintisi dörd milyard dollara başa gəlib. Bu, inşaat işlərinə, boru kəmərinin doldurulmasına çəkilən xərclər və maliyyə xərcləridir. Bank faizlərinin ödənilməsi bura daxil deyil. Maliyyə kreditinin ümumi həcmi 2,6 milyard dollar təşkil edir.
"BTC Co"nun səhmdarları aşağıdakılardır: BP (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).