Azərbaycan, Bakı, 22 dekabr /Trend, müxbir E.İsmayılov/
Yazın başlamasınadək ARDNŞ (Azərbaycan Resbuplikası Dövlət Neft Şirkəti) "Qobustan Əməliyyat Şirkəti"nin istehsalat sahəsində geofiziki tədqiqatlar çərçivəsində səhra işlərini başa çatdıracaq. Bu barədə çərşənbə günü neft-qaz sektorundakı mənbə məlumat verib.
Onun sözlərinə görə, hazırda "Hacıvəlli" sahəsində ikiölçülü geofiziki tədqiqat işləri aparılır.
"Hazırda tədqiqat davam edir, sahədə səhra işlərinin fevralın sonlarınadək başa çatdırılması planlaşdırılır", - mənbə bildirib.
Onun sözlərinə görə, səhra işləri başa çatdıqdan sonra əldə olunan məlumatların analizi və təfsiri aparılacaq.
ARDNŞ ilə imzalanan PSA tipli müqavilə çərçivəsində "Cənub-Qərbi Qobustan" yatağının işlənməsi ilə "Qobustan Əməliyyat Şirkəti" (GOC) məşğul olur. GOC-da 80 faiz iştirak "Commonwealth Gobustan Limited" şirkətinə, 20 faiz isə ARDNŞ-yə məxsusdur.
Müqavilə sahəsi ümumi sahəsi 604 kvadrat kilometr olan üç blokdan ibarətdir. Bu bloklara əvvəllər işlənmiş "Şıxzakirli, "Şeynatud", "Vürküt", "Donuzluq", "Nardaran", "İlxıçı", "Qərbi Hacıvəli", "Sundi", "Şərqi Hacıvəli", "Turağay", "Kənizdağ", "Qərbi Duvannı", "Duvannı", "Solaxay" və "Daşgil" yataqları daxildir.
