Azərbaycan, Bakı, 27 dekabr /Trend, müxbir E.İsmayılov/
Gələn il ARDNŞ "Azərikimya" İstehsalat Birliyinin bazasında iki yeni qurğunun montajına başlayacaq. Bu barədə bazar ertəsi ARDNŞ prezidenti Rövnəq Abdullayev deyib.
Onun sözlərinə görə, aşağı təzyiqli polipropilen və polietilen istehsalı üzrə qurğuların montajı artıq 2013-cü ilə kimya məhsulunun istehsalını artırmağa imkan verəcək.
"Birliyin tərkibinə daxil olan müəssisələrdə artıq modernləşdirmə üzrə işlər aparılıb, nəticədə məhsul çıxışı 26-27 faizdən 40-42 faizədək artıb", - Abdullayev qeyd edib.
Şirkət rəhbəri onu da qeyd edib ki, kimya kompleksinin modernləşdirilməsi üzrə işlər ARDNŞ-nin 2011-ci il üçün fəaliyyətinin əsas istiqamətlərindən biridir.
"Azərikimya" ARDNŞ-nin tərkibinə daxil ediləndən sonra İB-nin tərkibinə daxil olan bütün müəssisələrdə əsaslı təmirə başlanılıb. Köhnəlmiş və istismara yararsız avadanlıqlar sökülüb.
İB-nin tərkibinə daxil olan müəssisə və zavodlarda modernləşdirmə üzrə işlər çərçivəsində çox elektrik və su sərf edən qurğuların dəyişdirilməsi planlaşdırılır. İstehsal edilən məhsulların keyfiyyətinin artırılması və xammalın diversifikasiyalaşdırılması üçün İB bütün müəssisələrində xammalın bölüşdürülməsi sisteminin yenilənməsi üzrə işlər görmək niyyətindədir, bu isə öz növbəsində yüksək keyfiyyətli birbaşa qovulmuş benzinin, propan-propilen fraksiyasının, eləcə də qaz fraksiyaının tədarükünü nəzərdə tutur.
Burada tərkibinə hazır kimya məhsullarının istehsalında ixtisaslaşan (birdəfəlik boşqab, plastik pəncərə və s.) xeyli kiçik müəssisələrin daxil olacağı texniki parkın yaradılması da nəzərdə tutulur.
