Azərbaycan, Bakı, 28 dekabr /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının işlənməsinin texniki operatoru olan Böyük Britaniyanın BP şirkəti bu yatağın genişmiqyaslı mənimsənilməsi çərçivəsində işlərə Heydər Əliyev adına qazma qurğusunu cəlb edə bilər. Bu barədə çərşənbə axşamı neft-qaz bazarındakı mənbə məlumat verib. Qazma qurğusu birgə müəssisəsinin operatoru qismində "Maersk Drilling" şirkəti çıxış edir.
Onun sözlərinə görə, qurğu yataqdakı işlərə 2012-ci ildə cəlb edilə bilər.
Hazırda qurğu Xəzərin Azərbaycan sektorundakı "Abşeron" perspektiv strukturunda qazma nöqtəsindədir. Kəşfiyyat qazmasına yanvar ayında başlana bilər. Mənbənin fikirncə, "Abşeron" strukturunda qazma prosesi bir ilədək uzana bilər. Mənbə bunu strukturun kifayət qədər dərinlikdə yerləşməsi ilə izah edib ki, bu da qazma işlərinin dəqiq aparılmasını tələb edir.
Mənbənin dediyi kimi, çox güman ki, qurğu gələn ilin çox hissəsini "Abşeron"da kəşfiyyat qazması ilə məşğul olacaq.
Lakin artıq BP 2012-ci ildə qurğunu "Şahdəniz" yatağındakı işlərə cəlb edə bilər. Mənbə bunu "İstiqlal" qurğusundan başqa ikinci qazma qurğusunun olmasının vacibliyi ilə əsaslandırıb, çünki yatağın genişmiqyaslı işlənməsi çərçivəsində çoxlu sayda quyunun qazılması nəzərdə tutulub.
"Şahdəniz" yatağının genişmiqyaslı işlənməsi çərçivəsində iki dəniz platforması quraşdırılacaq və 30 sualtı quyu qazılacaq.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
