Azərbaycan, Bakı, 28 dekabr /Trend, müxbir E.İsmayılov/
2011-ci ildə ARDNŞ-nin Gürcüstanın 31 qaz təsərrüfatının qazlaşdırılmasının üçillik proqramı çərçivəsində investisiyalarının həcmi 30 milyon dollara yaxın olacaq. Bu barədə çərşənbə günü ARDNŞ-nin Gürcüstandakı törəmə şirkəti olan "SOCAR Energy Georgia"dakı mənbə deyib.
Onun sözlərinə görə, proqramın ikiillik yekunu üzrə ARDNŞ-nin qazlaşdırma proqramı çərçivəsində invetisiyalarının həcmi 60 milyon dollara yaxın olacaq.
"Proqramın həyata keçirilməsinin üçüncü ilə ərzində qazlaşdırma prosesinə təxminən 30 milyon dollar yatırılacaq", - mənbə qeyd edib.
Onun sözlərinə görə, hazırda Gürcüstan regionlarının qazlaşdırılması üzrə işlər davam etdirilir və yanvarın sonuna kimi başa çatmalı olan proqramın ikinci ilinin yekunları üzrə yeni abonentlərin sayı 100 minə çatacaq.
2008-ci il dekabrın 26-da ARDNŞ və Gürcüstan hökuməti 30 paylayıcı qaz təsərrüfatı və paylayıcı qaz şəbəkəsənin istifadəyə götürülməsi haqqında müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şida və Kvemo-Kartli, Acarıstan, Quriya, İmereti, Sameqrelo kimi regionlarını əhatə edir. Bu şəbəkələr 24 şirkət tərəfindən istismar edilib.
Apreldə "SOCAR Energy Georgia" şirkəti, həmçinin Gürcüstanın azərbaycanlıların kompakt yaşadığı Marneuli rayonunun paylayıcı qaz şəbəkəsini də istifadəyə alıb. Bu, cəmi 31 qaz təsərrüfatı deməkdir.
Bir müddət əvvəl Marneulidə paylayıcı qaz şəbəkəsinin sahibi "Wissol" şirkəti idi. O, ARDNŞ-dən qaz alaraq Marneuli ərazisində satırdı.