Azərbaycan, Bakı, 14 yanvar /Trend, müxbir E.İsmayılov/
Böyük Britaniyanın BP şirkəti ayın sonunadək Xəzərin Azərbaycan sektorundakı "Şahdəniz" qaz-kondensat yatağında yeni hasilat quyusunu istismara verəcək. BP "Şahdəniz" yatağının işlənməsinin texniki operatoru qismində çıxış edir. Bu barədə cümə günü neft-qaz bazarındakı mənbə bildirib.
Onun sözlərinə görə, hazırda yeni quyuda yaxın vaxtlarda başa çatacaq mənimsəmə üzrə işlər davam etdirilir.
"Quyunun mənimsənilməsi üzrə işlər başa çatmaq mərhələsindədir və artıq bu ayın sonuna istismara verilə bilər", - mənbə bildirib.
Onun sözlərinə görə, yatağın yeni quyularında işlər çox diqqətlə aparılır, çünki bu quyular yüksəkdebitlidir.
Hazırda yataqda qaz hasilatı dörd quyudan aparılır. "Şahdəniz" platformasından sutkalıq qaz hasialtı 20-23 milyon kubmetr səviyyəsindədir. Yeni quyu istismara verildikdən sonra hasilat sutkada 15-16 milyon kubmetrə çata bilər.
İşlənmənin birinci mərhələsi çərçivəsində yataqda ən yüksək hasilat həddi 8,6-9 milyard kubmetr səviyyəsində proqnozlaşdırılır.
Yatağın ehtiyatları 1,2 trilyon kubmetr qaz qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.