Azərbaycan, Bakı, 16 fevral /Trend, müxbir E.İsmayılov/
Bu il ARDNŞ Gürcüstanın 31 qaz təsərrüfatının qazlaşdırılmasına dair proqram çərçivəsində 30 milyon dollara yaxın investisiya yatırmaq niyyətindədir. Bu barədə çərşənbə günü Trend-ə ARDNŞ-nin Gürcüstandakı törəmə şirkəti "SOCAR Energy Georgia"dakı mənbə deyib.
Üçillik proqram çərçivəsində ümumilikdə 150 min potensial abonentin əhatə olunması planlaşdırılır. Yenidənqurma və qazlaşdırma işlərinə başlanana qədər abonentlərin sayı 60 min təşkil edib.
"Proqram çərçivəsində işlər uğurla davam etdirilir. Bu il qazlaşdırma prosesinə qoyulacaq investisiyaların həcmi orta hesabla 30 milyon dollar təşkil edib", - mənbə qeyd edib.
2008-ci il dekabrın 26-da ARDNŞ və Gürcüstan hökuməti 30 paylayıcı qaz təsərrüfatı və paylayıcı qaz şəbəkəsənin istifadəyə verilməsi haqqında müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şida və Kvemo-Kartli, Acarıstan, Quriya, İmereti, Sameqrelo kimi regionlarını əhatə edir. Bu şəbəkələr 24 şirkət tərəfindən istismar edilib.
2010-cu ilin aprelində "SOCAR Energy Georgia" şirkəti Gürcüstanın azərbaycanlıların kompakt yaşadığı Marneuli rayonunun paylayıcı qaz şəbəkəsini də istifadəyə alıb. Bu, cəmi 31 qaz təsərrüfatı deməkdir.