Azərbaycan, Bakı, 9 mart /Trend, müxbir E.İsmayılov/
ARDNŞ Xəzərdə "Bulla Dəniz-82" platformasından eyni adlı yataqda kəşfiyyat quyusunun qazmasını bərpa edib. Bu barədə çərşənbə günü ARDNŞ-dəkı mənbə deyib.
Onun sözlərinə görə, hazırda quyunun dərinliyi layihələşdirilən 6400 metrdən 6150 metr təşkil edir.
"Təmir avadanlığı ilə bağlı məsələ həll edildikdən sonra qazma bərpa edilib", - mənbə bildirib.
Onun fikrincə, qazma hələ bir neçə ay ərzində davam etdiriləcək. Bu, quyunun dərinliyi ilə bağlıdır.
Bundan əvvəl ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadənin dediyinə görə, bu quyu perspektivlidir. Bundan əvvəl Geofizika və Geologiya İdarəsi quyuda baş verən prosesləri müşahidə və nəzarət etmək məqsədilə uzaq müşahidə sistemi olan "RT-Leuza" da quraşdırılıb.
"Bulla Dəniz" yatağı 1975-ci ildən istismar olunur. 34 il ərzində yataqdan 62 milyard kubmetr qaz və 11 milyon ton neft və qaz-kondensat hasil edilib.
"Bulla Dəniz" yatağından sutkada 450 min kubmetr qaz hasil edilir. ARDNŞ geoloqlarının fikrincə, bu yataqda qaz hasilatını bir neçə dəfə artırmaq olar.
