Azərbaycan, Bakı, 11 mart /Trend, müxbir T.Cəfərov/
Cari ilin 11 ayı ərzində (İranda il martın 21-də dəyişir) "Cənub Pars" yatağına 10,7 milyard dollar sərmayə yatırılıb və bu rəqəmin 2012-ci ilin əvvəlinədək 13-15 milyard dollara çatacağı gözlənilir. Bu sözləri İranın Milli Neft Şirkətinin direktoru Əhməd Qalebani deyib. Bu barədə Trend İranın İSNA xəbər agentliyinə istinadən məlumat verir.
Qalebani əlavə edib ki, ötən 11 ay ərzində "Cənub Pars" yatağına yatırılmış sərmayənin 6 milyard dolları vəsaitlərin cəlb edilməsi üçün əhaliyə istiqrazların satışından əldə olunub.
O, bildirib ki, martın 12-dən İranın Mərkəzi Bankı əlavə vəsaitlərin cəlb edilməsi üçün əhaliyə 3 milyard avro həcmində istiqrazları üç bank - "Saderat", "Ticarət" və "Sepah" - vasitəsilə dövriyyəyə buraxacaq.
Qalebani əlavə edib ki, gələcəkdə istiqrazların satışının digər ölkələrin bankları vasitəsilə də həyata keçirilməsi planlaşdırılır.
Məlumata əsasən, istiqrazların illik gəlirliliyi 8 faiz təşkil edir. İstiqrazlar 1000, 5000, 10000, 50000 və 100000 avro dəyərində buraxılır.İstiqrazların dövriyyə müddəti 4 ildir. Hökumət alıcıları əldə edəcəkləri gəlir üzrə vergidən azad edib. İstiqrazlar adsız olduğu üçün başqasına satıla bilər.
Son illər ərzində İranın nüvə proqramı fəaliyyətləri ilə bağlı bu ölkəyə qarşı beynəlxalq sanksiyalar artırılıb. Bu da İranda fəaliyyət göstərən xarici şirkətlərin bu ölkədə neft və qaz layihələrində sərmayə yatırmaqdan çəkindirir. Ötən illər ərzində bir neçə böyük neft şirkətləri, o cümlədən Fransanın "Total" və Norveçin "Statoil" şirkətləri İranın neft və qaz layihələrindən geri çəkiliblər. İran çalışır ki, xarici şirkətlərin yerin yerli investorlarla doldursun.
İran beynəlxalq sanksiyalara görə xarici şirkətlərin ölkədəki neft-qaz layihələrindən geri çəkilməsi boşluğunu doldurmaq məqsədi ilə ilk dəfə 2009-cu ildə əlavə vəsaitlərin cəlb edilməsi üçün əhaliyə istiqrazların satışına başlayıb. Həmin il 1,5 mlyard avro həcmində istiqraz satışa çıxarılıb.
İranın neft naziri Məsud Mirkazimi fevralın 8-də Xuzistan əyalətində "Darxuin" neft yatağının inkişafı layihəsinin ikinci fazasının açılış mərasimində jurnalistlərə verdiyi açıqlamada deyib ki, ölkənin beşillik inkişaf proqramı çərçivəsində neft və qaz sahəsinə 150 milyard dollar sərmayə yatırılmalıdır.
