Azərbaycan, Bakı, 14 mart /Trend/
Yanvar-fevralda Azərbaycanda səkkiz milyon tona yaxın neft və kondensat hasil olunub ki, bu da 2010-cu ilin analoji dövr göstəricisindən 0,2 faiz azdır. Bu barədə bazar ertəsi Dövlət Statistika Komitəsindən məlumat verilib.
2010-cu ildə Azərbaycanda cəmi 50,83 milyon ton neft hasil olunub.
Ötən il neft hasilatının əsas həcmi xarici tərəfdaşlarla birgə işlənən "Azəri-Çıraq-Günəşli" yataqlar blokunun və "Şahdəniz" qaz-kondensat yatağının payına düşüb.
Yanvar-fevralda Azərbaycanda qaz hasilatı 4,1 milyard kubmetrə yaxın təşkil edib ki, bu da 2010-cu ilin analoji dövr göstəricisindən 3,3 faiz azdır.
Ötən il respublikada 26,23 milyard kubmetr qaz hasil olunub ki, bunun da 16,67 milyardı əmtəə qazının payına düşüb.
Yanvar-fevralda Azərbaycanda 3,6 milyard kilovat-saat elektrik enerjisi istehsal olunub. Bu, 2010-cu ilin analoji dövr göstəricisindən 2,4 faiz çoxdur.
