Azərbaycan, Bakı, 18 aprel /Trend/
Cari ilin sonunadək (İranda il martın 21-də dəyişir) Xəzər dənizində İranın ilk kəşfiyyat quyusunun qazılması başa çatacaq. Bunu İranın Milli Neft Şirkətinin kəşfiyyatlar üzrə direktoru Mahmud Mühəddis deyib. Bu barədə Trend İranın /mojnews.com/ xəbər saytına istinadən məlumat verir.
O əlavə edib ki, İran Xəzər dənizində neft platformasının inşasına 500 milyon dollardan artıq sərmayə yatırıb. "Xəzərdə kəşfiyyat qazma işlərinin bir hissəsi başa çatıb. 2012-ci ilin mart ayına kimi ilk quyunun istifadəyə verilməsini planlaşdırmışıq", - Mühəddis bildirib.
İran 2010-cu il fevralın ortalarında Xəzərdə "Əmir Kəbir" platformasında ilk kəşfiyyat quyusunun qazılmasına başlayıb. Bu platformada birinci mərhələdə üç kəşfiyyat quyusunun qazılması nəzərdə tutulur. İran qazmanı öz karbohidrogen ehtiyatlarını dəqiqləşdirmək üçün aparır.